İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 302 Hüküm no: 282 Orijinal metin no: [64a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolikoğlu Mikail v. Ohannes’in vârislerinin beş re’s bargir hissesinde birbirlerinin zimmetlerini ibra ettikleri Beş re’s bârgir hisse mübâya‘ası Mukābele şüd Sarrâf tâifesinden Markar oğlu Kirkor v. Mardıros nâm zimmî meclis-i şer‘-i hatîr-i lâzımü’t-tevkīrde vilâyet-i Anadolu’da Eğin kazâsına tâbi‘ Apçağa karyesinde mütemekkine hâmiletü’r-rakīm Margarita bt. İpsar v. Filibus Nasrâniye tarafından zikri âtî husûsu tasdîka vekîl olduğu şahsını bilir karye-i mezbûre ahâlisinden bu esnâda Âsitâne-i aliyye’ye gelen Filibus v. Nikagos ve Dekiryos v. Kirkor zimmîler şehâdetleriyle ber-nehc-i şer‘î sâbit olan Arakil v. Parnik nâm zimmî muvâcehesinde habbâzân kethudâsı ve bi’l-cümle nizâm ustaları hâzır oldukları hâlde ikrâr-ı tam ve takrîr-i kelâm edip medîne-i Üsküdar’a muzâfe Yoros nâhiyesine tâbi‘ Çengel karyesinde vâki‘ ma‘lûmü’l-hudûd bir bâb habbâz fırını ve ona merbût karye-i mezbûrede kâin yedi uncu ve beş ekmekçi cem‘an altı horos yirmi dört re’s bârgir i‘tibâr olunan gedik ta‘bîr olunur âlât-ı lâzıme-i ma‘lûmenin altı re’s bârgir hissesi işbu hâzır bi’l-meclis Kara Mağdis oğlu Sahak zimmînin ve dört re’s bârgir hissesi gāib ani’l-meclis Harman oğlu Agop v. Filibus zimmînin ve ikişer re’s bârgir hisseleri gāibân ani’l-meclis Kara Mağdis oğlu Mardıros v. İstefan zimmî ile Mağdis Ananye zimmî zevcesi Karyana bt. Vartos Nasrâniye’nin ve bir re’s bârgir hissesi müvekkile-i mersûmenin kayın anası gāibetü ani’l-beled Harospima Nasrâniye’nin dört re’s bârgir hissesi gāibe-i mersûmenin kızı kezâlik gāibetü ani’l-beled Ana Nasrâniye’nin ve beş re’s bârgir hissesi akd-i âti’z-zikrin sudûruna değin bâ-hüccet-i şer‘iye benim yedimizde iştirâken ve şâyi‘an emvâlimiz olmağla hâlâ ben âlât-ı lâzıme-i ma‘lûme-i mezkûrede ber-vech-i muharrer mâlik olduğum beş re’s bârgir hisse-i şâyi‘amı şürekâ-i mersûmûnun izinleriyle tarafeynden îcâb ve kabûlü hâvî şurût-ı müfside ve muvâza‘adan ârî bey‘-i bâtt-ı sahîh-i şer‘î ve safka-i vâhide ile müvekkile-i mersûme Margarita Nasrâniye’ye dört bin guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı merkūm dört bin guruşu müşteriye-i müvekkile-i mersûme Margarita Nasrâniye bana def‘ ü teslîm ben dahi yedinden tamamen ve kâmilen ahz ü kabz etmemle mebî‘-i mezkûrun tağrîr ve gabnine müte‘allika âmme-i da‘vâdan müvekkile-i mersûme Margarita Nasrâniye’nin zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledim ba‘de’l-yevm âlât-ı lâzıme-i mezkûrenin ber-i‘tibâr-ı merkūm beş re’s bârgir hissesi müvekkile-i mersûme Margarita Nasrâniye’nin emvâl-i müşterâtı ve hakk-ı sırfı olup benim kat‘a alâka ve medhalim kalmamışdır dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 Receb sene 1238. Şühûdü’l-hâl: Eş-şâhidûne’s-sâbıkūni’l-mesbûkūn. [Beyaz]