İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 304 Hüküm no: 283 Orijinal metin no: [64b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kolikoğlu Mikail’in vârislerinden Ana bt. Kolikoğlu Mikail v. Ohannes’in dört re’s bargir hisseye sahip olduğu Habbâz fırını tasadduku Mukābele şüd Medîne-i Üsküdar’a muzâfe Yoros nâhiyesine tâbi‘ Çengel karyesinde vâki‘ ma‘lûmü’l-hudûd bir bâb habbâz fırını ve ona merbût karye-i merkūmede kâin biri uncu ve beşi ekmekçi cem‘an altı horos yirmi dört re’s bârgir i‘tibâr olunan gedik ta‘bîr olunur âlât-ı lâzıme-i ma‘lûmenin altı re’s bârgir hissesine mâlik olan Kara Mağdis oğlu Sahak v. Abraham zimmî kendi nefsinden asâleten ve iki re’s bârgir hissesine mâlik olan ammi oğlu Mardıros v. İstepan zimmî ile bir re’s bârgir hissesine mâlike olan Kolikoğlu Mikâil nâm hâlikin zevcesi Harospima bt. Nikagos Nasrâniye taraflarından husûs-ı âtîde vekîl olduğu Nasrâniye-i mersûmenin şahsını bilir Filibus v. Nikagos ve Dekiryos v. Kirkor zimmîler şehâdetleriyle ber-nehc-i şer‘î sâbit olmağla vekâleten ve dört re’s bârgir hissesine mâlik olan Harmanoğlu Agop zimmî ile iki re’s bârgir hissesine mâlike olan Mağdis Ananya zimmî zevcesi Karyana bt. Vartos Nasrâniye taraflarından kezâlik husûs-ı âtîde vekîl olduğu Nasrâniye-i mersûmenin şahsını bilir şâhidân-ı mersûmân şehâdetleriyle ber-nehc-i şer‘î sâbit olan mersûm Agop zimmînin babası Filibus v. Arakil zimmîler meclis-i şer‘-i hatîr-i lâzımü’t-tevkīrde beş re’s bârgir hissesine mâlike olan Margarita bt. İpyar v. Filibus Nasrâniye << taraflarından >> tarafından kezâlik husûs-ı âtîde vekîl olduğu şahsını bilir şâhidân-ı mersûmân şehâdetleriyle sâbit olan Arakil v. Parnik zimmî hâzır olduğu hâlde dört re’s bârgir hissesine mâlike olan hâmiletü’r-rakīm Ana bt. el-mersûm Kolikoğlu Mikâil v. Ohannes Nasrâniyenin kaynı ve tarafından kezâlik husûs-ı âtîde tasdîka vekîl olduğu şahsını ârifân şâhidân-ı mersûmân şehâdetleriyle sâbit olan Sarrâf Sakaoğlu dâmâdı Mardıros v. Bağdisyar zimmî muvâcehesinde habbâzân kethudâsı ve bi’l-cümle nizâm ustaları kezâlik hâzır oldukları hâlde her biri bi’l-asâle ve bi’l-vekâle ikrâr-ı tam ve takrîr-i kelâm edip bâlâda tafsîl ve beyân olunduğu üzere fırın ve değirmen-i mezkûrun ber-i‘tibâr-ı merkūm beş re’s bârgir hissesi mukaddemâ müvekkile-i mersûme Ana Nasrâniye’nin babasından mevrûs yedinde mülkü iken bundan akdemce bir re’s bârgir hissesini karındaşı evlâdı olup müvekkile-i mersûme Margarita Nasrâniye’nin sadrî evlâdı olan Nikagos ve Tatos ve Manas ve Penbe ve diğer Harospima nâm beş nefer sıgāra bâ-hüccet ba‘de’l-bey‘ sıgār-ı mersûmûnun anaları ve vasîleri mersûme Margarita Nasrâniye dahi bi’l-vesâye sıgār-ı mesfûrûnun cem‘an beş re’s bârgir hisselerini bâ-hüccet âhara bey‘ ve ba‘dehû âhardan kendi nefsi içün iştirâ ve kabz edip ol-vechile âlât-ı lâzıme-i ma‘lûme-i mezkûrenin el-yevm dört re’s bârgir hissesi müvekkile-i mersûme Ana Nasrâniye’nin bi’l-irsi’ş-şer‘î mülkü olup bizim ve müvekkilûn-ı mersûmûnun dört re’s bârgir hissesinde kat‘a alâka ve medhalimiz yokdur dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 13 Receb sene 1238. Şühûdü’l-hâl: Eş-şâhidûne’s-sâbıkūn.