İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 313 Hüküm no: 292 Orijinal metin no: [67b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Efendi b. Hüseyin ve kardeşi Osman’ın mâlik oldukları değirmen için kendilerine hüccet verilmesi Değirmen ihbârı İhrâc şüd fî 11 B sene [12]39. Vakfiye ihrâc fî 29 R sene [12]62. Mahmiye-i İstanbul’da Sarıgez kurbünde Beyhamamı civârında sâkin Ali Efendi b. el-Hâc Hüseyin nâm kimesne meclis-i şer‘-i şerîf-i enverde habbâzân esnâfının kethudâları Mehmed Efendi b. Ali ve nizâm ustalarından Yusufpaşalı Murad Ağa ve Nahılbendlı Nazım Ağa ve Cumalıpazarlı Yaşar İbrahim Ağa ve Debbâğhâneli Maksud Ağa nâm kimesneler ile Yorgi v. Hıristo ve İspaso v. Kiryako ve Andon v. Anderya nâm zimmîler hâzırûn oldukları hâlde takrîr-i kelâm ve bast-ı ani’l-merâm edip mahmiye-i mezbûrede zikr olunan Sarıgez nâm mahâlde kâin ma‘lûmü’l-hudûd bir bâb ekmekçi fırını ve ittisâlinde kâin bir bâb değirmen ile derûnlarında mevcûde beyne’l-esnâf gedik ta‘bîr olunur esnâfımızda olan bâ-defter-i müfredât bi’l-cümle âlât-ı lâzıme-i ma‘lûme benim ve li-ebeveyn er karındaşım işbu hâzır bi’l-meclis mürâhık Osman’ın münâsafeten irsen ve şirâen yedimizde emlâk ve emvâlimiz olup lâkin yedimizde sened-i şer‘iyemiz olmamağla hakīkat-i hâl hâzırûn-ı mezbûrundan lede’l-istihbâr yedimize bir kıt‘a sened-i şer‘iye i‘tâ olunmak matlûbumuzdur dedikde gıbbe’s-suâl kethudâ ve hâzırûn-ı merkūmûn dahi cevâblarında fi’l-hakīka hâl bâlâda bast ü beyân olunduğu minvâl üzere olup zikirleri mürûr eden fırın ve değirmen ile derûnlarında mevcûde beyne’l-esnâf gedik ta‘bîr olunan âlât-ı lâzıme-i ma‘lûme merkūm Ali Efendi ile karındaşı hâzır-ı mürâhık-ı mezbûr Osman’ın irsen ve şirâen münâsafeten yedlerinde emlâk ve emvâlleri olup âharın kat‘a alâka ve medhali yokdur deyü her biri meclis-i şer‘de alâ tarîki’ş-şehâde haber vermeleriyle hıfzen li’l-makāl işbu vesîka-i enîka ketb ü imlâ olunup mezbûr Ali Efendi yedine li-ecli’s-sened i‘tâ olundu. Fî 28 Ş sene 1238. Şühûdü’l-hâl: Kethudâ-yı muhzırân İsmail Ağa, Abdurrahman Efendi (b.) Ali, Mehmed Ârif Ağa b. Süleyman, Muhzır Molla Mahmud, Muhzır Molla Mustafa ve gayruhum.