İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 314 Hüküm no: 294 Orijinal metin no: [68a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Nikola v. Kostandi’nin vârislerinin bakkal dükkânını Ali Ağa b. Mehmed’e sattıkları Bakkāl mübâya‘ası 1.450 guruş Mahmiye-i İstanbul’da Kumkapı dâhilinde İbrahimpaşa Câmi‘-i şerîfi karşısında bakkāl dükkânında mütemekkin iken bundan akdem bin iki yüz yirmi üç senesi hilâlinde hâlik olan Bakkāl Nikola v. Kostandi nâm zimmînin verâseti zevce-i metrûkesi Sivasti bt. Peredomoz nâm Nasrâniye ile sulbî kebîr oğulları Peredomoz ve Kostandi ve Manol zimmîler ve sulbiye kebîre kızları Makrina ve Sare Nasrâniyelere münhasıra ve tashîh-i mesele-i mîrâsları altmış dört sehmden olup sihâm-ı mezbûrenin ve sekiz sehmi zevcesi mersûme ve on dörder sehmi oğulları mesfûrûndan her birine ve yedişer sehmi kızları mersûmetândan her birine isâbeti tahakkukundan sonra kendi nefsinden asıl ve hâlik-i mersûmun zevcesi mersûme Sivasti Nasrâniye ile mersûmetân Makrine ve Sare Nasrâniyeler taraflarından husûs-ı âti’l-beyânda vekîlleri olduğu bi’l-mu‘arrefeti’ş-şer‘iye şahıslarını bilir Nikfor v. Hıristo ve Apostol v. Kiryanos nâm zimmîler şehâdetleriyle mahzar-ı hasm-ı câhidde ber-nehc-i şer‘î sâbit ve sübût-ı vekâletine hükm-i şer‘î lâhık hâlik-i mesfûrun kebîr oğlu mesfûr Manol zimmî meclis-i şer‘-i hatîr-i lâzımü’t-tevkīrde karındaşları mesfûrân Peredomoz ve Kostandi zimmîler hâzır oldukları hâlde işbu bâ‘isü’l-kitâb Ali Ağa b. Mehmed nâm kimesne mahzarında bi’l-asâle ve bi’l-verâse ve bi’l-vekâle ikrâr-ı tam ve takrîr-i kelâm edip mahmiye-i mezbûrede Kumkapı dâhilinde zikr olunan İbrahimpaşa Câmi‘-i şerîfi karşısında kâin Ali Bey dükkânı demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur bir terâzî ma‘a derâhim ve bir kantar ve bir küp ve beş fıçı ve bir peştahta ve bir akçe tahtası ve sâir âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharların mâlı ve otuz sehmi müstakıllen benim mâlım ve otuz sehmi babam hâlik-i mesfûr Nikola zimmînin ile’l-helâk yedinde mâlı ve mülkü olup ba‘de helâkihî tashîh-i merkūm üzere benimle müvekkilât-ı mersûmâna ve hâzırân-ı mesfûrâna mevrûs olmağla âlât-ı lâzıme-i merkūmede akd-i âti’z-zikrin sudûruna değin ber-i‘tibâr-ı merkūm müstakıllen mâlik olduğum otuz sehm hisse-i şâyi‘ayı yedi yüz yirmi beş guruşa ben bi’l-asâle ve müvekkilât-ı mesfûrât Sivasti ve Makrine ve Sare Nasrâniyeler ve hâzırân-ı mersûmân Peredomoz ve Kostandi zimmîler ile benim tashîh-i merkūm üzere irsen mâlikler olduğumuz ber-i‘tibâr-ı mezkûr otuz sehm-i şâyi‘ı dahi yedi yüz yirmi beş guruşa ki cem‘an bin dört yüz elli guruşa ben bi’l-verâse ve bi’l-vekâle ve karındaşlarım hâzırân-ı mesfûrân Peredomoz ve Kostandi zimmîler bi’l-verâse tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîk-i âharın izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle merkūm Ali Ağa’ya bey‘ ve temlik ve vech-i lâyıkı üzere teslîm eylediğimizde ol dahi yedimizden iştirâ ve temellük ve tesellüm ve kabz ve kabûl ve semen-i mecmû‘-ı merkūm bin dört yüz elli guruşu benimle hâzırân-ı mersûmâna def‘ ve teslîm eylediğinde biz dahi yedinden bi-kadri’l-hısas tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim ve müvekkillerim mesfûrât Sivasti ve Makrine ve Sare Nasrâniyelerin ve hâzırân-ı mesfûrân Peredomoz ve Kostandi zimmîlerin kat‘a alâka ve medhallerimiz kalmayup ber-i‘tibâr-ı merkūm cem‘an altmış sehmi mezbûr Ali Ağa’nın mâl-ı müşterâsı ve hakk-ı sırfı olmuşdur dedikde hâzırân-ı mersûmân Peredomoz ve Kostandi zimmîler ile merkūm Ali Ağa’dan her biri tasdîk etmeğin mâ-vaka‘a bi’t-taleb ketb olundu. Fî 15 min-Ş sene 1238. Şühûdü’l-hâl: Pazarbaşı Süleyman Ağa b. ( ), Bölükbaşı Molla Abdi b. ( ), Kâtib Ahmed Efendi b. ( ), Ali Ağa [b.] Mustafa, Abdi Ağa b. Mustafa.