İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 315 Hüküm no: 295 Orijinal metin no: [68b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yoloğlu Panayot’un Limoncu Kif Yani’ye borcunu ödeyerek limoncu gediğini geri aldığı Limoncu gediği fekki Derûn-ı hüccetde mastûrü’l-ism tüccâr tâifesinde Yoloğlu Panayot zimmî meclis-i şer‘-i şerîf-i enverde kezâlik derûn-ı hüccetde mersûmü’l-ism Limoncu Gik Yani zimmî muvâcehesinde ikrâr-ı tam ve takrîr-i kelâm edip derûn-ı hüccetde tahrîr [ve] beyân olunduğu üzere mersûm Gik Yani zimmî zimmetinde cihet-i karzdan asl-ı mâl bin guruş ve bâ-devr-i şer‘î bir senelik nemâsı olan yüz elli guruş ki cem‘an alacak hakkım olan bin yüz elli guruşu mesfûr Gik Yani zimmî bana edâ ve teslîm ben dahi yedinden tamamen ve kâmilen ahz ü kabz ve istifâ etmemle meblağ-ı mecmû‘-ı mezkûr ma‘an benimle yedimde rehin olup mesfûra i‘âre ve teslîm ol dahi yedinde âriyet iken bana redd ü teslîm eylediği mahmiye-i İstanbul’da Zindân kapısı hâricinde limon iskelesinde vâki‘ derûn-ı hüccetde muharrer bir bâb limoncu dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmeyi rehniyetden fekk ile yine mesfûr Gik Yani zimmîye def‘ ü teslîm eylediğimde ol dahi yedimden ahz ü kabz edip fîmâ-ba‘d meblağ-ı mecmû‘-ı mezkûrdan mesfûrun zimmetinde bir akçe ve bir habbe alacak hakkım kalmayup âlât-ı lâzıme-i ma‘lûme-i mezkûrede dahi kat‘a alâka ve medhalim kalmamağla kemâ-fi’s-sâbık mersûm Gik Yani zimmînin mâlı ve mülküdür dedikde gıbbe’t-tasdîki’l-mu‘teber mâ-vaka‘a [bi’t-taleb ketb olundu.] Fî 8 N sene [1]238. Şühûdü’l-hâl: Pazarbaşı es-Seyyid İbrahim Sârım Bey b. Ahmed Bey, Bölükbaşı Molla Halil b. ( ), Muhzır Mehmed Emin, Ustabaşı Yorgi v. Nikola zimmî, diğer Yorgi v. İstemat zimmî, Yani v. İstemat zimmî.