İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 316 Hüküm no: 296 Orijinal metin no: [68b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gik Yani v. Yorgi’nin Limoncu gediğini Pandeli v. İstefani’ye sattığı Limoncu mübâya‘ası Mahmiye-i İstanbul’da Çarşambapazarı kurbünde Kiremid mahallesinde mütemekkin limoncu esnâfında Gik Yani v. Yorgi nâm zimmî meclis-i şer‘-i hatîr-i lâzımü’t-tevkīrde mahmiye-i mezbûrede kâin bakkāl esnâfından bâ‘isü’s-sifr Pandeli v. İstefani nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûre hısnı ebvâbından Zindân kapısı hâricinde limon iskelesi nâm mahâlde vâki‘ Zahîreci İbrahim Yazıcı dükkânı ile arsa-i hâliye beynlerinde kâin şehriye dört buçuk guruş kadîm kirâlı iki kepenk bir bâb limoncu dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde mâlım ve mülküm olan on küfe ve bir peştahta ve bir akçe tahtası ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin beş yüz guruşa mesfûr Pandeli zimmîye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan limoncu dükkânı âlât-ı lâzımesinde benim kat‘a alâka ve medhalim kalmayup mersûm Pandeli zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 9 N sene [12]38. Şühûdü’l-hâl: Pazarbaşı es-Seyyid İbrahim Sârım Bey b. Ahmed Bey, Bölükbaşı Molla Halil b. ( ), Muhzır Mehmed Emin b. ( ), Ustabaşı Yorgi v. Nikola zimmî, diğer Yorgi v. İstemat zimmî, Yani v. İstemat zimmî ve gayruhum.