İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 317 Hüküm no: 297 Orijinal metin no: [69a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Ağa b. Mehmed’in, Seyyid Osman Ağa’nın yerine bazergân başılığına tayini Bâzergân başılığı nasbı Vilâyet-i Anadolu’da vâki‘ medîne-i Kayseriye’den Âsitâne-i sa‘âdet-âşiyâneye sahtiyân celb eden Âsitâne-i aliyyede mukīm tüccârın bir müddetden beri bâzergânbaşıları olan hâzır bi’l-meclis es-Seyyid Osman Ağa bâzergânbaşılıktan rızâsıyla istifâ edip keff-i yed etmekle yerine tüccâr-ı merkūmûnun üzerlerine kıbel-i şer‘den bir bâzergânbaşı nasbı lâzım ve mühim olmağın tüccâr-ı merkūmûnun örf ve âdetlerine vâkıf ve nizâm-ı kadîmlerini arîf ve her vechile bâzergânbaşılık umûrunu rü’yete kādir ve cümlesinin merzî ve muhtârları idüğü esnâf ve tüccârdan zeyl-i kitâbda muharrerü’l-esâmî Müslimîn haberleriyle lede’ş-şer‘i’l-enver zâhir ve mukır olan tüccâr-ı merkūmûndan Âsitâne-i aliyyede mukīm işbu bâ‘isü’l-kitâb Sarı Hacızâde es-Seyyid el-Hâc Mehmed Ağa b. el-Hâc Mehmed’i hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -veffakahullâhu te‘âlâ ilâ-sebîli’s-savâb- efendi hazretleri tüccâr-ı merkūmûnun üzerlerine bâzergânbaşı nasb ü ta‘yîn ve bir ferde hilâf-ı şer‘-i şerîf ve mugāyir-i nizâm te‘addî ve rencîde etmemek üzere emr ü tenbîh buyurduklarında ol dahi kabûl ve ber-mûceb-i emr ü tenbîh hareket birle bâzergânbaşılık umûr-ı lâzımesini rü’yete ta‘ahhüd etmeğin mâ-vaka‘a bi’t-taleb [ketb olundu.] Fî 9 Şa‘bân sene [12]38. Şühûdü’l-hâl: Hâssa Çizmecibaşısı el-Hâc Hafız İbrahim Efendi, Dikicibaşı Ali Ağa, Başyiğitbaşı Ömer Ağa, Mestçiler Yiğitbaşısı Mehmed Ağa, Çedikçiler Kethudâsı Mehmed Ağa, Tüccârdan el-Hâc Davud Ağa, tüccârdan es-Seyyid el-Hâc Mustafa Ağa, tüccârdan Çapulcıoğlu? Mehmed Ağa, tüccârdan es-Seyyid Mustafa Ağa, tüccârdan es-Seyyid Lütfullah Ağa, tüccârdan es-Seyyid eş-Şeyh İbrahim Efendi, tüccârdan Hüseyin Efendi.