İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 318 Hüküm no: 298 Orijinal metin no: [69a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Sava’nın manav dükkânın gediğini Veli Hüseyin Beşe b. Mehmed’e sattığı Manav gediği mübâya‘ası 1400 guruş Mahmiye-i İstanbul’da kâin manav tâifesinden Vasil v. Sava nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb Veli Hüseyin Beşe b. Mehmed nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Tahtakale nâm mahâlde vâki‘ Hamam sokağı karşısında sığır kasabı dükkânı ittisâlinde tarîk-i hâs ile bakkāl dükkânı beynlerinde kâin bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan yedi sehmi âharların mâlı olmağla mâ‘adâsı olup akd-i âti’z-zikrin sudûruna değin benim yedimde mâlım ve mülküm olan yirmi üç sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile âhar şerîklerim izin ve icâzetleriyle bin altı yüz guruşa mezbûr Veli Hüseyin Beşe’ye bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin altı yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan manav dükkânı âlât-ı lâzıme-i ma‘lûmesinde benim kat‘a alâka ve medhalim kalmayup ber-i‘tibâr-ı merkūm yirmi üç sehmi mezbûr Veli Hüseyin Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 12 N sene [1]238. Şühûdü’l-hâl: Yaşyemiş Pazarbaşısı es-Seyyid İbrahim Sârım Bey b. Ahmed Bey, Bölükbaşı Molla Halil b. ( ), Muhzır Mehmed Emin b. ( ).