İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 318 Hüküm no: 299 Orijinal metin no: [69b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Todori’nin Abacı Yani v. Dimitri’nin zimmetini ibra ettiği Husûs ile ibrâ Tahakkuk-ı özr-i şer‘îye binâen husûs-ı âti’l-beyânın mahâllinde ketb ü tahrîri içün cânib-i şerî‘at-ı garrâdan bi’l-iltimâs me’zûnen irsâl olunan Kâtib es-Seyyid Mehmed Tâhir Efendi mahmiye-i İstanbul hısnı ebvâbından Ayazmakapısı hâricinde Kādı Hanı demekle ma‘rûf han derûnunda vâki‘ abacı esnâfına mahsûs lonca odasına varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i âlî ettikde İslimye kazâsına tâbi‘ Başköylü Dimitri v. Todori nâm zimmî meclis-i ma‘kūd-ı mezkûrda hâmilü’r-rakīm Abacı Yani v. Dimitri zimmî muvâcehesinde ikrâr-ı tam ve takrîr-i kelâm edip târih-i kitâbdan iki sene mukaddem mesfûr Yani zimmîye mâlımdan bey‘ ve teslîm ol dahi yedinden iştirâ ve kabz eylediği beheri altmış guruşa olarak yirmi bir aded dikilmiş cepken aba semenlerinden zimmetinde alacak hakkım olan cem‘an bin iki yüz altmış guruşu zimmî-i mersûm mukaddemâ ceste ceste tamamen bana edâ ve teslîm ben dahi yedinden ahz ü kabz eyledim fîmâ-ba‘d meblağ-ı merkūm bin iki yüz altmış guruşdan mesfûr Yani zimmî zimmetinde bir akçe ve bir habbe alacak hakkım kalmayup bi’l-cümle husûs-ı mezkûre ve sâir beynimizde cârî cemî‘ ahz ü i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt eyledik dedikde gıbbe’t-tasdîki’ş-şer‘î vâki‘ hâli kâtib-i merkūm mahâllinde ketb ü tahrîr ve ma‘an meb‘ûs ümenâ-i şer‘le meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a [bi’t-taleb ketb olundu.] Fî 27 B sene 1238. Şühûdü’l-hâl: Kethudâ Mehmed Tâhir Efendi, Hafız Ali Ağa, el-Hâc Osman Ağa, Muhzır Salih, Ömer Çelebi b. Salih ve gayruhum.