İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 319 Hüküm no: 300 Orijinal metin no: [69b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi b. Ömer’in yağcı bakkal dükkânını oğlu Mustafa Efendi’ye sattığı Mahzen mübâya‘ası Âsitâne-i aliyyede vâki‘ nişastacı esnâfından el-Hâc Mehmed Efendi b. Ömer nâm kimesne meclis-i şer‘-i şerîf-i enverde sulbî kebîr oğlu bâ‘isü’l-vesîka Mustafa Efendi tarafından zikri âtî husûsu tasdîka vekîl-i şer‘îsi Hafız İsmail Efendi b. Mustafa mahzarında bakkālân pazarbaşısı Süleyman Ağa b. Ömer ve Bölükbaşı Abdi Çelebi b. Mehmed ve sâir nizâm ustaları hâzır oldukları hâlde ikrâr-ı tam ve takrîr-i kelâm edip mahmiye-i İstanbul hısnı ebvâbından Zindân kapısı hâricinde Yoğurtçu sokağında Ahî Çelebi Câmi‘-i şerîfi civârında kâin taş mahzen demekle ma‘lûm bir bâb yağcı bakkāl dükkânı derûnunda mevcûde beyne’l-hıref gedik ta‘bîr olunur bir kantar ve bir terâzî ma‘a derâhim ve sâir âlât-ı lâzıme-i ma‘lûmenin yüz yirmi sehm i‘tibâriyle otuz sehmi akd-i âti’z-zikrin sudûruna değin benim ve doksan sehmi oğlum müvekkil-i mezbûr Mustafa Efendi’nin yedimizde iştirâken ve şâyi‘an emvâlimiz olmağla hâlâ ben ber-vech-i muharrer mâlik olduğum otuz sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile oğlum müvekkil-i mezbûr Mustafa Efendi’ye beş yüz guruşa bey‘ ve temlik ve vech-i lâyıkı üzere teslîm eylediğimde ol dahi ber-vech-i muharrer iştirâ ve temellük ve tesellüm ve kabz ü kabûl eyledikden sonra semeni olan meblağ-ı merkūm beş yüz guruş mutâlebesine müte‘allika âmme-i da‘vâdan oğlum müvekkil-i merkūm Mustafa Efendi’nin zimmetini kabûlü hâvî ibrâ ve iskāt eyledim ba‘de’l-yevm âlât-ı lâzıme-i muharrere-i mezkûrenin mecmû‘u oğlum müvekkil-i mezbûr Mustafa Efendi’nin emvâl-i müşterâsı ve hakk-ı sırfı olup benim aslâ ve kat‘a alâkam kalmamışdır dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 8 S sene 1238. Şühûdü’l-hâl: Yağcı İbrahim İbiş, el-Hâc Kadri Efendi, Pirin[c]ci es-Seyyid Mustafa Ağa, Revgan-ı zeyt Kethudâsı el-Hâc Hüseyin Ağa, Uncu Kürt Halil ve gayruhum.