İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 320 Hüküm no: 301 Orijinal metin no: [69b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Apaoğlu Avram v. Mosi ve Sabuncuoğlu Avram v. Mosi’nin bakkal dükkânı gediğini Boduroğlu Avram v. Yako’ya sattığı Yahûdî bakkāl mübâya‘ası Havâss-ı refî‘a kazâsına muzâfe kasaba-i Hasköy’de mütemekkinler bakkāl esnâfından Apaoğlu Avram v. Mosi ve Sabuncuoğlu diğer Avram v. diğer Mosi nâm Yahûdîler meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Boduroğlu âhar Avram v. Yako nâm Yahûdî muvâcehesinde her biri ikrâr-ı tam ve takrîr-i kelâm edip zikr olunan kasaba-i Hasköy’de Piripaşa mahallesinde kâin Şerbetçioğlu dükkânı demekle meşhûr ma‘lûmü’l-hudûd bir bâb Yahûdî bakkāl dükkânı derûnunda mevcûde beyne’l-hıref gedik ta‘bîr olunur akd-i âti’z-zikrin sudûruna değin bâ-hüccet-i şer‘iye iştirâken yedimizde mâlımız olan âlât-ı lâzıme-i ma‘lûmeyi tarafeynden îcâb ve kabûlü hâvî ve şurût-ı müfsideden ârî bey‘-i bât-ı sahîh-i şer‘î ve safka-i vâhide ile ve bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle üç yüz guruşa mesfûr Boduroğlu âhar Avram Yahûdîye bey‘ ve temlik ve teslîm eylediğimizde ol dahi yedimizden iştirâ ve temellük ve tesellüm ve kabz ü kabûl ve semeni olan meblağ-ı mezkûr üç yüz guruşu bize def‘ ü teslîm eylediğinde biz dahi yedinden tamamen ve kâmilen ahz ü kabz [70a] edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede bizim kat‘a alâkamız kalmayup mesfûr Boduroğlu âhar Avram Yahûdî’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 Ramazan sene 1238. Şühûdü’l-hâl: Pazarbaşı Süleyman Ağa, Bölükbaşı Molla Abdi, Kâtib Ahmed Efendi, Simyon zimmî, Yazıcı Eftat zimmî, Avram v. Salamon Yahûdî, Yaşava v. Avram Yahûdî ve gayruhum.