İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 321 Hüküm no: 302 Orijinal metin no: [70a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosi v. İlyazer’in bakkal dükkânı gediğini Avram v. Yako’ya sattığı Yahûdî bakkāl mübâya‘ası Havâss-ı refî‘a kazâsına muzâfe kasaba-i Hasköy’de mütemekkin bakkāl esnâfından Mosi v. İlyazer nâm Yahûdî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Avram v. Yako Yahûdî muvâcehesinde ikrâr-ı tam ve takrîr-i kelâm edip zikr olunan Hasköy kasabasında Pîrîpaşa çarşısı ötesinde aşçı dükkânı karşısında kâin ma‘lûmü’l-hudûd bir bâb Yahûdî bakkāl dükkânı derûnunda mevcûde akd-i âti’z-zikrin sudûruna değin bâ-hüccet-i şer‘iye müstakıllen yedimde mâlım ve mülküm olan beyne’l-esnâf gedik ta‘bîr olunur âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve bakkālân pazarbaşısı ve bölükbaşısı ve bi’l-cümle nizâm ustaları ma‘rifetleriyle iki yüz elli guruşa mesfûr Avram Yahûdîye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezkûr iki yüz elli guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâkam kalmayup mesfûr Avram Yahûdî’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 22 Ramazan sene 1238. [Şühûdü’l-hâl:] es-Sâbıkūne’ş-şâhidûn.