Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 343 Hüküm no: 376 Orijinal metin no: [60a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ali için kayıp kocası üzerine nafaka takdiri Mahmiye-i İstanbul’da el-Hâc Muhyiddin mahallesi sâkinelerinden olup zâtı ma‘rifet-i şer‘iyye ile ârifân Ahmed Çelebi b. Mustafa ve Bayram b. Şaban nâm kimesneler ta‘rîfleriyle mu‘arrefe olan Hatice bt. Ali nâm hâtun meclis-i şer‘-i şerîfde takrîr-i kelâm edip zevcim gāib ani’l-meclis Abdülbâkī b. Abdullah nâm kimesne târih-i kitâbdan üç ay mukaddem beni bilâ-nafaka bırakıp âhar diyâra gidip kimesneden havâle ve îsâl dahi etmemekle mezbûr Abdülbâkī üzerine kıbel-i şer‘den kadr-i ma‘rûf nafaka farz ve takdîr olunmak matlûbumdur dedikde gıbbe’t-tasdîki’ş-şer‘î hâkim-i muvakki‘-i sadr-ı kitâb -tûbâ-lehû ve hüsnü me’âb- hazretleri dahi mezbûre Hatice’nin ve kisve ve sâir levâzım-ı zarûriyyesi için kıbel-i şer‘den kadr-i ma‘rûf mezbûr Abdülbâkī üzerine târih-i kitâbdan yevmî altı akçe far[z] ve takdîr edip meblağ-ı mefrûz-ı mezbûru kendiye harc ve sarfa ve lede’l-iktizâ istidâneye ve inde’z-zafer mezbûr Abdülbâkī üzerine rücû‘a mezbûre Hatice’[ye] izin verilmeğin mâ vaka‘a bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Çelebi b. Veli, Ahmed Çelebi b. Hamza, Hasan b. Abdullah, el-Hâc Mustafa b. Tevekkül, İbrahim Çelebi b. Ahmed ve gayruhüm.