Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 343 Hüküm no: 377 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi ve Mustafa Çelebi b. Ahmed’in buğday satışından Ali Beşe’de alacaklarının kalmadığı Mahmiye-i İstanbul’da Âşıkpaşa mahallesi sükkânından Mehmed Çelebi ve Mustafa Çelebi b. Ahmed meclis-i şer‘-i şerîf-i enverde yine mahalle-i mezbûre sükkânından Ali Beşe b. Mehmed mahzarında her biri ikrâr ve takrîr-i kelâm edip bundan akdem yedimizde mülk ve hakkımız olan ma‘lûmü’l-mikdâr buğdayımızı âhara bey‘ ve kabz-ı semene ve semenini bize teslîm merkūm Ali Beşe’yi tarafeynden vekîl edip ol dahi ba‘de’l-kabûl zikr olunan buğday âhara bey‘ ve semenleri elli bin iki yüz akçeye bâliğ ve meblağ-ı mezbûru merkūm Ali Beşe bi’l-vekâle ahz u kabz etmiş idi hâlâ merkūm Ali Beşe meblağ-ı mezbûr elli bin iki yüz akçe ile cihet-i karz-ı şer‘îden zimmetinde hakkımız olan seksen guruş bize edâ ve teslîm biz dahi yedinden bi’t-tamâm ahz u kabz eyledik fîmâ ba‘d meblağayn-i mezbûreynden merkūm Ali Beşe yedinde ve zimmetinde bir akçe ve bir habbe bâkī kalmadı dediklerinde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Ali b. Abdullah, el-Hâc Musa b. Hüseyin, Mehmed Çelebi b. İbrahim, Mehmed Çelebi b. Hüseyin, Mustafa b. Ali, Yunus Çelebi b. Haydar.