İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 321 Hüküm no: 303 Orijinal metin no: [70a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Beşe b. Ömer’in manav dükkânı gediğini İbiloğlu Ömer Beşe b. Mehmed’e sattığı Manav mübâya‘ası Mahmiye-i İstanbul’da kâin manav esnâfından Mustafa Beşe b. Ömer nâm kimesne meclis-i şer‘-i şerîf-i enverde yine esnâf-ı merkūmeden işbu bâ‘isü’l-vesîka İbiloğlu Ömer Beşe b. Mehmed mahzarında ikrâr-ı tam ve takrîr-i kelâm edip mahmiye-i mezbûrede Kapan-ı dakīk kapısı hâricinde vâki‘ ma‘lûmü’l-hudûd bir bâb manav dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz sehm i‘tibâriyle yirmi bir sehmi Saide Hanım’ın ve on yedi sehmi Mehmed Tâhir’in ve altmış bir sehmi işbu hâzır bi’l-meclis es-Seyyid İbrahim b. Mehmed’in mâlları olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye benim yedimde mâlım olan altmış bir sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şürekâ-i mezbûrûn izniyle bin guruşa mezbûr Ömer Beşe’ye bey‘ ü temlik ve vech-i lâyıkı üzere teslîm eylediğimde ol dahi yedinden iştirâ ve temellük ve tesellüm ve kabz ü kabûl ve semeni olan meblağ-ı mezkûr bin guruşu bana def‘ ü teslîm ben dahi yedinden bi’t-tamam ve’l-kemâl ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin i‘tibâr-ı merkūm üzere altmış bir sehmde benim kat‘a alâka ve medhalim kalmayup mezbûr Ömer Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 Ramazan sene 1238. Şühûdü’l-hâl: Başyemiş Pazarbaşısı es-Seyyid İbrahim Sârım Bey, Bölükbaşı Molla Halil, Muhzır Molla Hüseyin ve gayruhum.