İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 322 Hüküm no: 304 Orijinal metin no: [70b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Molla Mustafa b. Mehmed’in zeyt yağcı dükkânı gediğini Mehmed Emin Ağa b. Mehmed’e sattığı Zeyt yağcı mübâya‘ası Mahmiye-i İstanbul’da kâin Zeyt yağcı esnâfından Kasımpaşalı Molla Mustafa b. Mehmed nâm kimesne meclis-i şer‘-i hatîr-i lâzımü’t-tevkīrde yine esnâf-ı mezkûreden işbu bâ‘isü’l-vesîka es-Seyyid Mehmed Emin Ağa b. Mehmed mahzarında ikrâr-ı tam ve takrîr-i kelâm edip mahmiye-i mezbûre hısnı ebvâbından Odunkapısı hâricinde Zeyt Yağcılar sûkunda Yağcıbaşı ve el-Hâc Veliyüddin Ağa mahzenleri beynlerinde kâin Kasımpaşalı mahzeni demekle şeh[î]r bir bâb Zeyt yağcı mahzeni derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan bir kantar ve dört iskemle ve iki koğa ve iki fıçı ve bir akçe tahtası ve sâir âlât-ı lâzıme-i ma‘lûmenin nısf-ı şâyi‘larını yedimde ibkā ve nısf-ı şâyi‘-ı âharını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki bin beş yüz guruşa mezbûr es-Seyyid Mehmed Emin Ağa’ya bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm iki bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ-ba‘d zikr olunan gedik ta‘bîr olunur âlât-ı lâzımenin nısf-ı şâyi‘larında benim kat‘a alâkam kalmayup merkūm es-Seyyid Mehmed Emin Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 Ramazan sene 1238. Şühûdü’l-hâl: Kethudâ el-Hâc Hüseyin Ağa, es-Seyyid el-Hâc Ali Ağa, Salih Ağa, Mehmed Ağa.