İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 323 Hüküm no: 305 Orijinal metin no: [70b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Arnavud Halil Beşe b. Abdurrahman’ın ekmekçi iskemlesi gediğini Molla Hüseyin b. Nezir ve Yaşar Beşe b. Mehmed Tahir’e sattığı Kasımpaşa’da tabla mübâya‘ası Mahrûse-i Galata’ya muzâfe Kasımpaşa’da kâin ekmekçi tablakârlarından Arnavud Halil Beşe b. Abdurrahman nâm kimesne meclis-i şer‘-i hatîr-i lâzımü’t-tevkīrde kasaba-i mezbûrede Cum‘apazarı nâm mahâlde vâki‘ habbâz fırını ve değirmeninde ekmekçi ustaları olan bâ‘is-i hâzihi’l-vesîka Molla Hüseyin b. Nezir ile şerîki olup kendi nefsinden asıl ve diğer şerîkleri Yaşar Beşe b. Mehmed Tâhir tarafından husûs-ı âti’l-beyânı tasdîka vekîl-i şer‘îsi Molla Ali b. Ömer nâm kimesne mahzarlarında Mehmed Ağa b. Ahmed nâm kimesne hâzır olduğu hâlde ikrâr-ı tam ve takrîr-i kelâm edip mezbûr Mehmed Ağa’ya yedimizde olan işbu sene-i mübâreke Muharremi’l-harâmının yirmi altıncı günü ile müverraha ve sâbıkā kasaba-i mezbûre nâibi es-Seyyid Esad Efendi’nin imzâ ve hatmini hâviye bir kıt‘a hüccet-i şer‘iye nâtıka olduğu üzere zimmetinde cihet-i karzdan edâsı vâcib deynim olan altı yüz guruş semeni târih-i merkūmdan bir sene müeccelen yedinden iştirâ ve kabz eylediğim kitâb semeninden dahi doksan guruş ki cem‘an altı yüz doksan guruş deynim mukābilinde zikr olunan kasaba-i mezbûrede Sebil kapısında vâki‘ mâ-i lezîz çeşmesi önünde mevzû‘ mâlik olduğum beyne’l-esnâf ekmekçi iskemlesi gediği ta‘bîr olunur bir iskemle ve bir tablamı rehin vaz‘ ve teslîm eylediğimde mezbûr Mehmed Ağa dahi ba‘de’l-irtihân ve’l-kabz bana i‘âre etmekle yedimde âriyet olan sâbıku’z-zikr iskemle ve tablayı yine rehniyet üzere merkūma def‘ ü teslîm ol dahi ba‘de’l-kabz mezbûr Mehmed Ağa ber-vech-i muharrer zimmetinde alacağı olan meblağ-ı mecmû‘-ı mezkûrun yüz doksan guruşu mutâlebesine müte‘allika âmme-i da‘vâdan kabûlümü hâvî zimmetimi ibrâ ve iskāt eylediğinde meblağ-ı mecmû‘-ı merkūmdan zimmetimde bâkī deynim olan beş yüz guruşu dahi şürekâ-i mezbûrûn Molla Hüseyin ve Yaşar Beşe [ve] Molla Ali bi-şarti’r-rücû‘ emrimle hâzır-ı merkūm Mehmed Ağa’ya müşterek mâllarından edâ ve teslîm ol dahi ahz ü kabz edip << ol-vechile hâlâ yedinde>> zikr olunan iskemle ve tablayı rehniyetden fekk ve bana redd ü teslîm ben dahi yedinden ahz ü kabz edip ol-vechile hâlâ yedinde mevcûd akd-i âti’z-zikrin sudûruna değin yedimde mâlım ve mülküm olan mahâll-i merkūmda kâin beyne’l-esnâf ekmekçi iskemlesi gediği ta‘bîr olunur bir iskemle ve bir tabla ve sâir âlât-ı lâzımemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin sekiz yüz guruşa asılân-ı mezbûrân Molla Hüseyin ve Molla Ali ve müvekkil-i mezbûr Yaşar Beşe’ye ale’l-iştirâki’s-seviyy bey‘ ü temlik ve teslîm eylediğimde onlar dahi yedinden iştirâ ve temellük ve tesellüm [71a] ve kabz ü kabûl edip semeni olan meblağ-ı merkūm bin sekiz yüz guruşu mezbûrûna cihet-i karzdan bin üç yüz guruş ve bi-şarti’r-rücû‘ emrimle hâzır-ı merkūm Mehmed Ağa’ya müşterek mâllarından edâ ve teslîm eyledikleri meblağ-ı merkūm beş yüz guruş ki cem‘an zimmetimde deynim olup iştirâken alacak hakları olan bin sekiz yüz guruşa takas ve mahsûb ve ol-vechile istifâ-yı hak eylediğimde onlar dahi mukāssa ve kabûl edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan iskemle ve tabla ve sâir âlât-ı lâzıme-i ma‘lûmede benim kat‘a alâka ve medhalim kalmayup merkūmân Molla Hüseyin ve Molla Ali ve müvekkil-i mezbûr Yaşar Beşe’nin ale’l-iştirâki’s-seviyy mâl-ı müşterâları ve hakk-ı sırfları olmuşdur dedikde hâzır-ı merkūm Mehmed Ağa ile mezbûrân Molla Hüseyin ve Molla Ali’den her biri bi’l-asâle ve bi’l-vekâle tasdîk eylediği mâ-vaka‘a [bi’t-taleb ketb olundu.] Fî 28 Şa‘bân sene 1238. Şühûdü’l-hâl: Kethudâ Mehmed Efendi, Yiğitbaşı Mehmed Ali Ağa, Nazım Ağa.