İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 324 Hüküm no: 306 Orijinal metin no: [71a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Siron v. Haçador’un kuyumcu dükkânı gediğini Bedros v. Kigork’a sattığı Kuyumcu mübâya‘ası Mahmiye-i İstanbul’da kâin kuyumcu esnâfından Siron v. Haçador nâm zimmî meclis-i şer‘-i şerîf-i enverde yine esnâf-ı merkūmeden işbu hâmilü’r-rakīm Bedros v. Kigork nâm zimmî muvâcehesinde ikrâr-ı tam ve takrîr-i kelâm edip mahmiye-i mahkiyede kuyumcular içinde vâki‘ Ağa sokağının bezzâzistân-ı atik cânibinin sağ tarafından i‘tibâriyle şehriye elli para kadîm kirâlı onuncu bir bâb kuyumcu dükkânı derûnunda mevcûde beyne’l-hıref iki gedik ta‘bîr olunur âlât-ı lâzıme-i ma‘lûmelerinden akd-i âti’z-zikrin sudûruna değin yedimde mâlım ve mülküm olan evvelki gedik ta‘bîr olunur âlât-ı lâzımemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Bedros zimmîye bin iki yüz elli guruşa bey‘ ü temlik ve teslim eylediğimde ol dahi yedinden iştirâ ve temellük ve tesellüm ve kabz ü kabûl ve semeni olan meblağ-ı merkūm bin iki yüz elli guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle ba‘de’l-yevm zikr olunan dükkân derûnunda mevcûde evvelki gedik ta‘bîr olunur âlât-ı lâzıme-i merkūmede benim kat‘a alâkam kalmayup mesfûr Bedros zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ramazan sene 1238. Şühûdü’l-hâl: Kuyumcular Kethudâsı Ali Ağa, Muhzır Molla Emin, Mütevellî Takfor, Ohannes v. Manuk, Kigork v. Tavit, Anparsum v. Kapril.