İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 328 Hüküm no: 312 Orijinal metin no: [72a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaşova v. İlya’nın kuyumcu dükkânı gediğini İncici İlya v. İsak’a sattığı Mübâya‘a-i kuyumcu Havâss-ı refî‘a kazâsına muzâfe kasaba-i Hasköy’de Turşucu mahallesinde mütemekkin Yaşova v. İlya Yahûdî meclis-i şer‘-i hatîr-i lâzımü’t-tevkīrde işbu hâmilü’r-rakīm İncüci İlya v. İsak nâm Yahûdî muvâcehesinde ikrâr-ı tam ve takrîr-i kelâm edip mahmiye-i İstanbul’da Mercan çarşısı kurbünde âyîneceler içinde kuyumcular sokaklarından Reisoğlu sokağında vâki‘ çukacı dükkânı fevkınde kâin ma‘lûmü’l-hudûd bir bâb kuyumcu odası derûnunda mevcûde beyne’l-hıref gedik ta‘bîr olunur akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr İlya Yahûdî’ye iki bin beş yüz guruşa bey‘ ve temlik ve teslîm ol dahi yedimden iştirâ ve temellük ve tesellüm ve kabz edip ve semeni olan meblağ-ı merkūm iki bin beş yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d şehriye üç guruş kadîm kirâlı zikr olunan bir bâb oda derûnunda mevcûde gedik ta‘bîr olunur âlât-ı lâzıme-i ma‘lûmede benim kat‘a alâkam kalmayup mesfûr İlya Yahûdî’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 4 Ramazan sene 1238. Şühûdü’l-hâl: Eş-şâhidûne’s-sâbıkūn.