Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 344 Hüküm no: 378 Orijinal metin no: [60a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Manoli v. Tosiri’nin evini Laskari’ye sattığı Mahmiye-i İstanbul’da Ayvansaray kapısı dâhilinde Koca Mustafa Paşa mahallesinde sâkin Manoli v. Tosiri nâm zimmî meclis-i şer‘-i şerîf-i enverde işbu bâ‘isü’l-vesîka Laskari nâm zimmî muvâcehesinde ikrâr ve i‘tirâf edip silk-i mülkümde münselik olup mahalle-i mezbûrede vâki‘ bir tarafı Kalova mülkü ve bir tarafı müşter[î]-i mezbûr mülkü ve bir tarafı kilise hadîkası ve bir taraf tarîk-i âm ile mahdûd fevkānî iki oda ve tahtânî bir oda ve bir sofa ve bir ahır ve tahtapûş ve matbah ve kenîfi müştemil mülk menzilimi bi cümleti’t-tevâbi‘ ve’l-levâhık mezbûr Laskari’ye iki yüz kırk esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm ol dahi iştirâ ve kabûl ve temellük ve tesellüm eyledikden sonra semeni olan meblağ-ı mezbûr iki yüz kırk guruşu yedinden alıp kabz eyledim ba‘de’l-yevm menzil-i mezbûr mülk-i müşterâsıdır keyfe mâ yeşâ mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fî gurreti Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Hâfız İsmail Efendi b. Mehmed el-İmâm, Müezzin Ahmed Halîfe b. Abdurrahman, Mehmed Bey b. el-Hâc Mustafa, Hâfız Mehmed Halîfe b. Musli el-Muvakkit, Halil Bey b. Ahmed, Papa Londari v. Yorgi, Papa Dimitri v. Romanos, Papa Yano v. Todoş.