İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 329 Hüküm no: 313 Orijinal metin no: [72a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim İbiş Usta b. Hüseyin’in Seyyid Halil Usta b. Mustafa’nın yerine nalçacı esnafı kethudalığına tayini Kethudâ nasbı Âsitâne-i aliyye ve bilâd-ı selâsede kâin bi’l-cümle na‘lçacı esnâfının bir müddetden beri kethudâları olan esnâf-ı mezkûreden es-Seyyid Halil Usta b. Mustafa nâm kimesne meclis-i şer‘-i hatîr-i lâzımü’t-tevkīrde esnâf-ı mezkûrenin umûrunu rü’yetden izhâr-ı acz ve fîmâ-ba‘d kat‘a umûr-ı esnâfa müdâhale etmemek üzere kethudâlık-ı merkūmdan rızâsıyla keff-i yed edip azlolunmağla yerine esnâf-ı merkūme üzerlerine bir kethudâ nasbı lâzım ve mühim olunmağın emânet ile ma‘rûf ve istikāmet ile mevsûf ve örf ve âdetlerine vâkıf ve nizâmlarını arîf ve her vechile kethudâ umûrunu rü’yete kādir ve cümlesinin merzî ve muhtârları idüğü esnâf-ı merkūmeden zeyl-i sahîfede mektûbü’l-esâmî Müslimîn haberleriyle zâhir ve mütehakkık olan yine esnâf-ı mezkûreden işbu hâzır bi’l-meclis bâ‘isü’l-vesîka İbrahim İbiş Usta b. Hüseyin -hâkim-i hâsim-i vâlâ-cenab veffakallâhu te‘âlâ ila sebîli’s-savâb- efendi hazretleri kethudâ-i ma‘zûl-i merkūmun yerine esnâf-ı merkūme üzerlerine kethudâ nasb ü ta‘yîn ve esnâfından kimesneye hilâf-ı şer‘-i şerîf ve mugāyir-i rızâ te‘addî ve rencîde etmemek üzere emr ü tenbîh buyurduklarında ol dahi kethudâlık-ı merkūmeyi kabûl ve ber-mûceb-i emr ü tenbîh harekete ta‘ahhüd etmeğin mâ-vaka‘a [bi’t-taleb ketb olundu.] Fî 6 Şevvâl sene 1238. Şühûdü’l-hâl: Kasımpaşalı Osman Usta, Koskalı Mustafa Usta, Balatlı Osman Usta ve gayruhum.