İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 329 Hüküm no: 314 Orijinal metin no: [72b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sava v. Hıristo’nun havyarcı bakkal dükkânı gediğini Argiri bt. Yorgo’ya sattığı Havyarcı bakkālı Kaydı ihrâc şüd fî 3 M sene [12]76. Mahmiye-i İstanbul’da kâin havyarcı esnâfından Sava v. Hıristo nâm zimmî meclis-i şer‘-i hatîr-i lâzımü’t-tevkīrde şahsı ta‘rîf-i şer‘î ile mu‘arrefe olan işbu bâ‘isetü’s-sifr Argiri bt. Yorgo nâm Nasrâniye muvâcehesinde ikrâr-ı tam ve takrîr-i kelâm edip mahmiye-i mezbûrede Balık Pazarı Kapısı hâricinde vâki‘ İstemat dükkânı demekle arîf ma‘lûmü’l-hudûd bir bâb havyarcı bakkāl dükkânı derûnunda mevcûde beyne’l-hıref gedik ta‘bîr olunur âlât-ı ma‘lûmenin yüz yirmi sehm i‘tibâriyle otuz sehmi işbu hâzır bi’l-meclis havyarcı Yoseb v. Hıristo v. Serd otuz sehmi gāib ani’l-meclis Havyarcı Ağtim v. Demanos nâm zimmîlerin mâlları olmağla bâkīsi olup akd-i âti’z-zikrin sudûruna değin bâ-hüccet-i şer‘iye yedimde mâlım olan altmış sehm hisse-i şâyi‘anın otuz sehmini yedimde ibkā etmemle mâ‘adâsı olan otuz sehm-i şâyi‘ını tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve şerîklerim mesfûrânın izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle on bin guruşa mesfûr Argeri Nasrâniyeye bey‘ ve temlik ve vech-i lâyıkı üzere teslîm eylediğimde ol dahi ber-minvâl-i muharrer yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm on bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt edip fîmâ-ba‘d zikr olunan havyarcı dükkânı âlât-ı lâzıme-i ma‘lûmesinin i‘tibâr-ı merkūm üzere otuz sehm-i şâyi‘ında benim kat‘a alâkam kalmayup mesfûr Argiri Nasrâniyenin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 18 Ramazan sene 1238. Şühûdü’l-hâl: Pazarbaşı Süleyman Ağa, Kâtib Ahmed Efendi, Havyarcı Eremya v. Yani, Dimitri v. Panayot, Havyarcı Vasil v. İlya.