İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 330 Hüküm no: 315 Orijinal metin no: [72b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Argiri bt. Yorgo’nun Sava v. Hıristo’ya olan borcunu ödeyerek havyarcı bakkal dükkânını geri aldığı Fekk-i rehn-i havyarcı bakkāl Derûn-ı hüccetde mersûmetü’l-ism olup şahsı ta‘rîf-i şer‘î ile mu‘arrefe olan Argiri bt. Yorgo nâm Nasrâniye meclis-i şer‘-i hatîr-i lâzımü’t-tevkīrde kezâlik derûn-ı hüccetde ismi mastûr havyarcı esnâfından Sava v. Hıristo nâm zimmî muvâcehesinde ikrâr ve takrîr-i kelâm edip derûn-ı hüccetde tahrîr ü beyân ve tafsîl ü ayân kılındığı üzere mesfûr Sava zimmî zimmetinde cihet-i karzdan on yedi bin beş yüz guruş ve bâ-devr-i şer‘î üç senelik nemâsı olan beş bin iki yüz elli guruş ki cem‘an alacağım olan yirmi iki bin yedi yüz elli guruşu mesfûr Sava zimmî bana edâ ve teslîm ben dahi yedinden tamamen ve kâmilen ahz ü kabz ve istifâ eylediğimde meblağ-ı mecmû‘-ı mezkûr mukābilinde yedimde rehin olup mesfûr Sava zimmî isti‘âre etmekle yedinde âriyet olan mahmiye-i İstanbul’da Balık Pazarı Kapısı hâricinde İstemat dükkânı demekle [ârif] ma‘lûmü’l-hudûd bir bâb havyarcı dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehm hisse-i şâyi‘asını bana ba‘de’r-red ve’t-teslîm ve’l-kabz ben dahi hisse-i mezkûresini rehniyetden fekk ve yine mesfûr Sava zimmîye def‘ ü teslîm ol dahi kabz edip ol-vechile meblağ-ı mecmû‘-ı merkūm yirmi iki bin yedi yüz elli guruşdan mesfûr Sava zimmînin zimmetinde bir akçe ve bir habbe alacağım kalmayup âlât-ı muharrere-i mezkûrenin dahi i‘tibâr-ı mezkûr üzere altmış sehm hisse-i şâyi‘asında benim alâkam kalmamağla mesfûr Sava zimmînin kemâ-fi’s-sâbık mâlı ve mülküdür dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 17 Ramazan sene 1238. Şühûdü’l-hâl: Pazarbaşı Süleyman Ağa, Kâtib Ahmed Efendi, Havyarcı Vasil, Havyarcı Eremya, Dimitri zimmî ve gayruhum.