İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 335 Hüküm no: 321 Orijinal metin no: [74a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Vasil’in Aşçı Mehmed Ağa’ya borcunu ödeyerek bakkal dükkânını geri aldığı Fekk-i bakkāl Derûn-ı hüccetde ismi mastûr Aşçı Mehmed Ağa meclis-i şer‘-i enverde kezâlik derûn-ı hüccetde mastûrü’l-ism Bakkāl Vasil zimmî muvâcehesinde ikrâr-ı tam ve takrîr-i kelâm edip derûn-ı hüccetde tahrîr olunduğu üzere mesfûr Vasil zimmî zimmetinde cihet-i karzdan alacak hakkım olan bin guruş ile bâ-devr-i şer‘î işbu târih-i hâmişe gelince lâzım gelen ma‘lûmü’l-mikdâr nemâsını mesfûr Vasil zimmî bana tamamen edâ ve teslîm eylediğinde ben dahi yedinden tamamen ve kâmilen ahz ü kabz ve istifâ edip mukābelesinde mahmiye-i İstanbul’da Nûr-ı Osmânî Câmi‘-i şerîfi kurbünde vâki‘ Ahmed Çelebi dükkânı demekle ma‘rûf bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzımenin yüz yirmi sehm i‘tibâriyle rehin olan altmış sehm-i şâyi‘ını rehniyetden fekk eyledim ba‘de’l-yevm meblağ-ı mezbûrdan ve bâ-devr-i şer‘î nemâsından mesfûr Vasil zimmînin zimmetinde bir akçe ve bir habbe alacak hakkım ve zikr olunan âlât-ı lâzımenin ber-i‘tibâr-ı merkūm altmış sehmde benim kat‘a alâka ve medhalim kalmayup kemâ-fi’s-sâbık mesfûr Vasil zimmînin mâlı ve mülküdür dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 Şevvâl sene 1238. Şühûdü’l-hâl: Pazarbaşı Süleyman Ağa, Bölükbaşı Abdi Ağa, Kâtib Ahmed Efendi.