İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 336 Hüküm no: 322 Orijinal metin no: [74a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Yuvan’ın borcuna karşılık havyarcı bakkal dükkânını Kostandi v. Yorgi’ye rehin bıraktığı Rehn-i bakkāl Mahmiye-i İstanbul’da kâin havyarcı bakkāl esnâfından Dimitri v. Yuvan nâm zimmî meclis-i şer‘-i hatîr-i lâzımü’t-tevkīrde esnâf-ı merkūmeden işbu bâ‘isü’s-sifr Kostandi v. Yorgi nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûre hısnı ebvâbından Balık Pazarı Kapısı hâricinde vâki‘ tarafeyni tütüncü ve havyarcı dükkânları ve bir tarafı cidâr-ı hısn ve bir tarafı tarîk-i âm ile mahdûd gön dükkânı demekle ma‘rûf bir bâb havyarcı bakkāl dükkânı derûnunda mevcûde beyne’l-esnâf gedik ta‘bîr olunur iki terâzî ma‘a derâhim ve iki kantar ve yirmi fıçı ve sâir âlât-ı lâzıme-i ma‘lûmeden yüz yirmi sehm i‘tibâriyle bâ-hüccet-i şer‘iye yedimde mâlım ve mülküm olan on sehm hisse-i şâyi‘amı mesfûr Kostandi zimmîye zikri âtî bana idâne edeceği meblağ mukābilinde rehin vaz‘ ve teslîm eylediğimde ol dahi irtihân ve şâyi‘an kabz ve kabûl ve yine bana i‘âre ve teslîm ben dahi isti‘âre ve kabz eylediğimden sonra mesfûr Kostandi zimmî mâlından bana iki bin altı yüz guruş ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı merkūm ile semeni işbu târih-i rakīmden üç sene tamamına değin müeccel ve mev‘ûd yine mesfûr Kostandi zimmînin mâlından ve yedinden iştirâ ve kabz eylediğim bir hilâlî sâ‘at semeninden dahi dokuz yüz guruş ki cem‘an üç bin beş yüz guruşu zimmetimde mesfûr Kostandi zimmîye vâcibü’l-edâ deynim olup mukābelesinde zikr olunan âlât-ı lâzımenin i‘tibâr-ı merkūm üzere yedimde âriyet olan on sehm-i şâyi‘ı minvâl-i muharrer üzere rehindir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 8 Şevvâl sene 1238. Şühûdü’l-hâl: Pazarbaşı Süleyman Ağa, Bölükbaşı Molla Abdi, Kâtib Ahmed Efendi, Lefter v. Anaştaş zimmî, Yazıcı Eftat v. Panayot zimmî, Tanaş v. Kostandi zimmî, Lefter v. Anaştaş zimmî, Çakıroğlu Yorgi v. Atam zimmî, Kābız-ı mâl Simyon v. Atam zimmî, Dimitri v. Yani zimmî ve gayruhum.