Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 344 Hüküm no: 379 Orijinal metin no: [60b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Ahmed Efendi Vakfı’na ait evin tasarruf hakkının İbrahim Çelebi’ye devredilmesi Mahrûse-i Galata müzâfâtından kasaba-i Fındıklı mahallâtından Perizat Hâtun mahallesinde sâkin Hasan b. Abdullah nâm kimesne tarafından husûs-ı âti’l-beyâna vekîl olduğu mahalle-i mezbûr sükkânından es-Seyyid Ali Çelebi b. es-Seyyid Mehmed ve el-Hâc Mehmed b. Abdullah nâm kimesneler şehâdetleriyle şer‘an sâbit olan Mehmed Beşe b. Ömer nâm kimesne ile müvekkil-i mezbûr Hasan’ın zevce-i menkûhası Kâtibe bt. Abdullah nâm hâtun meclis-i şer‘-i şerîf-i enverde mahalle-i mezbûre ahâlîsinden bâ‘isü hâze’l-kitâb İbrahim Çelebi b. Abdullah tarafından ikrâr-ı âti’z-zikri tasdîke vekîl olduğu şâhidân-ı mezbûrân es-Seyyid Ali Çelebi b. es-Seyyid Mehmed ve el-Hâc Mehmed b. Abdullah şehâdetleriyle şer‘an sâbit olan el-Hâc Osman b. İlyas nâm kimesne mahzarında her biri bi’l-asâle ve bi’l-vekâle ikrâr-ı tâm ve takrîr-i kelâm edip merhûm Seyyid Ahmed Efendi vakfından olup mahalle-i mezbûrede vâki‘ bir tarafdan dahi yine vakf-ı mezbûrdan olup el-Hâc Ramazan tasarrufunda olan vakf menzil ve bir tarafdan dahi yine vakf-ı mezbûrdan olup Saraylı Sâliha Hâtun tasarrufunda olan menzil ve bir tarafdan dahi tarîk-i hâs ve bir tarafdan tarîk-i âm ile mahdûd icâre-i mu‘accele-i ma‘lûme ve yevmî bir akçe icâre-i müeccele ile ale’l-iştirâki’s-seviy taht-ı tasarrufumuzda olup bir bâb fevkānî ve bir bâb tahtânî odaları ve havlu ve kenîfi müştemil menzilimizi cümle tevâbi‘ ve levâhıkı ile mezbûr İbrahim Çelebi’ye doksan esedî guruş bedel mukābelesinde izn-i mütevellî-i vakf-ı mezbûr ile ferâğ ve tefvîz edip ol dahi ber vech-i muharrer tefvîz ve kabûl ve kabz eyledikden sonra bedel-i mezbûru yedinden tamâmen ahz u kabz eyledik ba‘de’l-yevm menzil-i mahdûd-ı mezkûr merkūm İbrahim Çelebi’nin hakk-ı müfevvezi olmuşdur dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâlis min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Ahmed Çelebi b. Abdullah kāimmakām-ı mütevellî, el-Hâc Osman [b.] İlyas, el-Hâc Mustafa b. Tevekkül, İbrahim Çelebi b. Ahmed ve gayruhüm.