İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 336 Hüküm no: 323 Orijinal metin no: [74b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Andon v. Matyos’un havyarcı bakkal dükkânını Merkel v. Tefyanos’a sattığı Havyarcı mübâya‘ası Mahmiye-i İstanbul’da kâin havyarcı bakkāl esnâfından Andon v. Matyos nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’s-sifr Merkel v. Tefyanos nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûre hısnı ebvâbından Balık Pazarı Kapısı hâricinde kâin Rali dükkânı demekle meşhûr ma‘lûmü’l-hudûd bir bâb havyarcı balık tuzlayıcı bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle doksan beş sehmi âharın yedinde mâlı olmağla mâ‘adâsı olup akd-i âti’z-zikrin sudûruna değin bâ-hüccet mâlım ve mülküm olan yirmi beş sehm hisse-i şâyi‘amın yirmi sehmini yedimde ibkā etmemle bâkī beş sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîkim izniyle iki bin guruşa mesfûr Merkel zimmîye bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezkûr iki bin guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı gedik-i merkūm i‘tibâr-ı mezbûr üzere beş sehmde benim kat‘a alâkam kalmayup mesfûr Merkel zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 5 Şevvâl sene 1238. Şühûdü’l-hâl: Pazarbaşı Süleyman Ağa, Bölükbaşı Abdi, Kâtib Ahmed, Aci Yorgi zimmî, Peredomoz zimmî, Sava zimmî, Vasil zimmî, Anaştaş zimmî, İstefan zimmî.