İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 337 Hüküm no: 324 Orijinal metin no: [74b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mahbube Hatun bt. Abdullah’ın kuruyemişci dükkânını Hasan Yazıcı b. Hafız Mustafa ve Molla Ahmed b. İbrahim’e sattığı Kuruyemişci mübâya‘ası Mahmiye-i İstanbul’da kâin kuruyemişci esnâfından Hasan Yazıcı b. el-Hâc Hafız Mustafa’nın vâlidesi zâtı ta‘rîf-i şer‘î ile mu‘arrefe olan Mahbube Hatun bt. Abdullah hâzıra olduğu hâlde meclis-i şer‘-i hatîr-i lâzımü’t-tevkīrde esnâf-ı mezkûreden bâ‘isü’l-kitâb Molla Ahmed b. İbrahim nâm kimesne tarafından husûs-ı âti’l-beyânı tasdîka vekîl-i şer‘îsi Kethudâ Mustafa Ağa b. Halil ile es-Seyyid Hüseyin Yazıcı b. Halil mahzarlarında hâzıra-i mezbûrenin tasdîkiyle ikrâr-ı tam ve takrîr-i kelâm edip mahmiye-i mezbûrede Zindân kapısı hâricinde kuruyemişciler sûkunda kâin el-Hâc Osman dükkânı demekle meşhûr bir tarafdan Halil Usta dükkânı ve üç tarafdan tarîk-i âm ile mahdûd bir bâb kuruyemişci dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle akd-i âti’z-zikrin sudûruna değin yüz on sehmi benim ve on sehmi vâlidem hâzıra-i mezbûrenin iştirâken yedimizde mâlımız olmağla ben âlât-ı lâzımeden i‘tibâr-ı merkūm üzere mâlik olduğum yüz on sehm hisse-i mezkûremi on bir bin guruşa ve vâlidem hâzıra-i mezbûre Mahbube Hatun kezâlik mâlike olduğu on sehm hissesini bin guruşa ki cem‘an on iki bin guruşa müvekkil-i mezbûr Molla Ahmed ile mezbûr es-Seyyid Hüseyin Yazıcı’ya << üzere>> nısfiyet üzere müştereken tarafeynden îcâb ve kabûlü hâvî şurût-ı müfsideden ârî bey‘-i bât-ı sahîh-i şer‘î ve safka-i vâhide ile bey‘ ü temlik ve teslîm eylediğimizde onlar dahi iştirâken yedimizden iştirâ ve temellük ve tesellüm ve kabz ü kabûl ve semen-i merkūmun on bir bin guruşunu bana ve bin guruşunu vâlidem hâzıra-i mezbûreye def‘ ü teslîm eylediklerinde biz dahi yedlerinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birlerimiz âharın zimmetlerini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim ve vâlidem hâzıra-i mezbûrenin aslâ ve kat‘a alâka ve medhalimiz kalmayup nısfı müvekkil-i mezbûr Molla Ahmed’in ve nısfı mezbûr es-Seyyid Hasan Yazıcı’nın mâl-ı müşterâları ve hakk-ı sırfları olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Şevvâl sene 1238. Şühûdü’l-hâl: Yiğitbaşı Mustafa Ağa, el-Hâc Veliyüddin Ağa, es-Seyyid Ali Yazıcı, Uzun Mehmed Ağa, es-Seyyid el-Hâc Ahmed Ağa, Muhzır Molla Halil, Kethudâ-yı muhzırân İsmail Ağa ve gayruhum.