İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 338 Hüküm no: 325 Orijinal metin no: [75a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kerope v. Andon’un tuhafcı dükkânı gediğini Mamcan v. Ohannes’e sattığı Mübâya‘a-i tuhafcı Mahmiye-i İstanbul’da kâin tuhafcı esnâfından Kerope v. Andon zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Mamcan v. Ohannes nâm zimmî muvâcehesinde ikrâr-ı tam ve takrîr-i kelâm edip mahmiye-i mezbûrede Mercan sûkunda Baba Ali fırını karşısında kâin ma‘lûmü’l-hudûd bir bâb tuhafcı dükkânı derûnunda mevcûde akd-i âti’z-zikrin sudûruna değin bâ-hüccet-i şer‘iye yedimde mâlım olan beyne’l-esnâf gedik ta‘bîr olunur bir akçe tahtası ve bir vezne ve bir terâzî ma‘a derâhim ve on kutu ve sâir âlât-ı lâzımeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile mesfûr Mamcan zimmîye üç bin beş yüz guruşa bey‘ ve temlik eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezbûr üç bin beş yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz ve istifâ edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile ibrâ ve iskāt dahi etmemizle fîmâ-ba‘d âlât-ı lâzıme-i mezkûrede benim kat‘a alâkam kalmayup mesfûr Mamcan zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 12 Şevvâl sene 1238. Şühûdü’l-hâl: Muhzırlar Kethudâsı İsmail Ağa, Muhzır Molla Mahmud, Kethudâ el-Hâc Mehmed Ağa.