İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 339 Hüküm no: 326 Orijinal metin no: [75a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Peraşkova v. Vasil’in bakkal dükkânı gediğini Yorgi v. Mavrodi’ye sattığı Mübâya‘a-i bakkāl Mahmiye-i İstanbul’da kâin bakkāl esnâfından Peraşkova v. Vasil zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’s-sifr Yorgi v. Mavrodi zimmî mahzarında ikrâr-ı tam ve takrîr-i kelâm edip mahmiye-i İstanbul’da Kādıçeşmesinde vâki‘ Mustafa Ağa dükkânı demekle meşhûr ma‘lûmü’l-hudûd bir bâb bakkāl dükkânı derûnunda mevcûde beyne’l-hıref gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde mâlım ve mülküm olan âlât-ı lâzıme-i ma‘lûmenin yüz yirmi sehm i‘tibâriyle altmış sehmini mülkümde ibkā etmemle mâ‘adâ altmış sehmini tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle yedi yüz guruşa mersûm Yorgi zimmîye bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm yedi yüz guruşu bana def‘ ü teslîm eylediğinde ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı mezkûrenin i‘tibâr-ı merkūm üzere altmış sehm hisse-i şâyi‘ında benim kat‘a alâkam kalmayup mersûm Yorgi zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 8 Şevvâl sene 1238. Şühûdü’l-hâl: Bölükbaşı Molla Abdi, Kâtib Ahmed Efendi, Pazarbaşı Süleyman Ağa, Kābız-ı mâl Simyon, Yazıcı Eftat, Çakıroğlu Yorgi.