İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 339 Hüküm no: 327 Orijinal metin no: [75a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anaştaş v. Todori’nin bakkal dükkânı gediğini Yasef v. Yasef’e sattığı Bakkal Mahmiye-i İstanbul’da kâin bakkāl esnâfından Anaştaş v. Todori nâm zimmî ve Sava v. Dimitri nâm zimmîler meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Yasef v. Yasef nâm zimmî muvâcehesinde her biri ikrâr-ı tam ve takrîr-i kelâm edip mahmiye-i İstanbul’da Kocamustafapaşa kurbünde Çınardibi nâm mahâlde kâin Hızır Bey dükkânı demekle arîf ma‘lûmü’l-hudûd bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle kırk sehmi işbu hâzır bi’l-meclis Aci Yordan v. Mikâil nâm zimmînin ve mâ‘adâ kırkar sehmden cem‘an seksen sehm hisse-i şâyi‘ası akd-i âti’z-zikrin sudûruna değin bâ-hüccet-i şer‘iye bizim yedimizde mâlımız olmağın âlât-ı mezkûreden i‘tibâr-ı merkūm cem‘an seksen sehm hissemizi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide şerîkimiz hâzır-ı mesfûrun izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle sekiz yüz yirmi guruşa mersûm Yasef zimmîye bey‘ ü temlik ve vech-i lâyıkı üzere teslîm eylediğimizde ol dahi iştirâ ve tesellüm ve kabz ü kabûl ve semenleri olan meblağ-ı merkūm sekiz yüz yirmi guruşu bize tamamen def‘ ü teslîm eylediğinde biz dahi yedlerinden bi-kadri’l-hısas ahz ü kabz edip [75b] mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûrenin i‘tibâr-ı merkūm üzere cem‘an seksen sehm hisse-i şâyi‘a-i mezkûresinde bizim kat‘a alâka ve medhalimiz kalmayup mesfûr Yasef zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 Şevvâl sene 1238. Şühûdü’l-hâl: Eş-şâhidûne’s-sâbıkūn.