İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 340 Hüküm no: 328 Orijinal metin no: [75b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Osman Nuri Beyefendi’nin sabuncu dükkânı gediğini İbrahim Ağa b. Seyyid Ahmed’e sattığı Koska’da sabuncu mübâya‘ası Medîne-i Üsküdar’a muzâfe İstavroz karyesinde sâkin Ma‘den Emîni-i esbak merhûm Abdi Paşazâde müderrisîn-i kirâm-ı zevi’l-ihtirâmdan es-Seyyid Osman Nuri Beyefendi tarafından husûs-ı âti’l-beyânı ikrâra ve i‘tâ-i hüccete vekîl olduğu es-Seyyid el-Hâc Emrullah Ağa b. İbrahim ve Mehmed Reşid Ağa b. Abdullah şehâdetleriyle sâbit olan İsmail Efendi b. Mustafa nâm kimesne meclid-i şer‘-i şerîf-i enverde Âsitâne-i aliyyede vâki‘ sabuncu esnâfının kethudâları işbu bâ‘isü’l-vesîka es-Seyyid el-Hâc İbrahim Ağa b. es-Seyyid Ahmed mahzarında bi’l-vekâle ikrâr-ı tam ve takrîr-i kelâm edip müvekkilim mûmâ-ileyh es-Seyyid Osman Nuri Beyefendi mahmiye-i İstanbul’da Koska nâm mahâlde vâki‘ iki tarafdan tabîb dükkânları beynlerinde kâin ma‘lûmü’l-hudûd bir bâb sabuncu dükkânı derûnunda mevcûde beyne’l-esnâf gedik ta‘bîr olunur akd-i âti’z-zikrin sudûruna değin bâ-hüccet-i şer‘iye müstakıllen yedimde mâlım olan âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm es-Seyyid el-Hâc İbrahim Ağa’ya yedi bin beş yüz elli guruşa bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm yedi bin beş yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı mezkûrede benim kat‘a alâka ve medhalim kalmayup merkūm es-Seyyid el-Hâc İbrahim Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 7 Şevvâl sene 1238. Şühûdü’l-hâl: es-Seyyid Mustafa Ağa, Yiğitbaşı Molla Süleyman, es-Seyyid Ali Ağa, es-Seyyid Molla Süleyman.