İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 341 Hüküm no: 329 Orijinal metin no: [75b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vasil v. Aleksi’nin bakkal dükkânını Dimitri v. Lazari’ye sattığı Mübâya‘a-i bakkāl Mahmiye-i İstanbul’da kâin bakkāl esnâfından Vasil v. Aleksi nâm zimmî meclis-i şer‘-i hatîr-i lâzımü’t-tevkīrde yine esnâf-ı merkūmeden işbu hâmilü’r-rakīm Dimitri v. Lazari muvâcehesinde ikrâr-ı tam ve takrîr-i kelâm edip mahmiye-i mezbûrede Nûr-ı Osmânî Câmi‘-i şerîfi kurbünde vâki‘ Ahmed Çelebi dükkânı demekle meşhûr ma‘lûmü’l-hudûd bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi Bal Kapanı tüccârından el-Hâc Davud Ağa’nın mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye benim yedimde mâlım olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide [ile] merkūm el-Hâc Davud Ağa’nın izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle iki bin üç yüz guruşa mersûm Dimitri zimmîye bey‘ ve temlik eylediğimde ol dahi yedimden iştirâ ve temellük ve tesellüm ve kabz ve semeni olan meblağ-ı merkūm iki bin üç yüz guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ-ba‘d âlât-ı merkūmenin i‘tibâr-ı merkūm altmış sehm hissesinde benim kat‘a alâkam kalmayup mesfûr Dimitri zimmînin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 8 Şevvâl sene 1238. Şühûdü’l-hâl: Pazarbaşı Süleyman Ağa, Bölükbaşı Molla Abdi, Kâtib Ahmed Efendi, Çakıroğlu Yorgi, Kābız-ı mâl Simyon, Yazıcı Eftat.