Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 345 Hüküm no: 380 Orijinal metin no: [60b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Mandavak v. Sahak ve ortağının alacak iddiasını ispat etmeleri için süre verilmesi Mahmiye-i İstanbul’da Edirnekapısı kurbunda sâkin habbâz tâifesinden Mandavak v. Sahak ve şerîki Dimo v. Voka nâm zimmîler meclis-i şer‘-i şerîf-i enverde destgâhdârları olan Riko v. Dimo nâm zimmî muvâcehesinde her biri üzerine da‘vâ ve takrîr-i kelâm edip mezbûr Riko bundan akdem destgâhdârımız olmağla on üç bin dokuz yüz otuz akçelik ekmeğimizi âhara bey‘ ve semeni kendi mesârifine sarfla istihlâk etmişdir hâlâ suâl olunup meblağ-ı mezbûrun alıverilmesi matlûbumuzdur dediklerinde gıbbe’s-suâl mezbûr Riko cevâbında fi’l-hakīka müdde‘iyânın destgâhdârı olmağla on üç bin dokuz yüz otuz akçelik ekmeklerini âhara bey‘ etmiş idim lâkin semen-i mezbûru kabz etmeyip elân zimem-i nâsdadır deyûcek, müdde‘iyân-ı mezbûrân[dan] müdde‘âlarını mübeyyine beyyine taleb olundukda ityân-ı beyyine için istimhâl etmekle mehl-i şer‘î birle imhâl olunmağın mâ hüve’l-vâki‘ bi’t-taleb ketb olundu. Fi’l-yevmi’l-hâmis ve’l-ışrîn min şehri Recebi’l-ferd li sene seb‘a ve tis‘în ve elf. Şuhûdü’l-hâl: Es-Seyyid Mehmed Efendi b. es-Seyyid İsmail, Ahmed Çelebi [b.] Mehmed, el-Hâc Mustafa [b.] Tevekkül, İbrahim Çelebi b. Ahmed, Ali Çelebi b. Bâli ve gayruhüm.