İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 346 Hüküm no: 335 Orijinal metin no: [77b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Ağa b. Mehmed’in helvacı ve turşucu dükkânını Seyyid Ali Usta b. Ali’ye sattığı Mübâya‘a-i helvacı Âsitâne-i aliyyede vâki‘ helvacı esnâfından Hüseyin Ağa b. Mehmed nâm kimesne meclis-i şer‘-i şerîf-i enverde zikri âtî gedik âlâtının nısf hisse-i şâyi‘asına mâlik olan işbu bâ‘isü’l-kitâb es-Seyyid Ali Usta b. Ali mahzarında bi’t-tav‘i’s-sâf ikrâr-ı tam ve takrîr-i kelâm edip mahmiye-i mezbûre hısnı ebvâbından Samatya kapısı dâhilinde Hacı Hüseyin mahallesinde vâki‘ ma‘lûmü’l-hudûd bir bâb helvacı ve turşucu dükkânı derûnunda mevcûde beyne’l-hıref << gedik ta‘bîr olunur >> ve helvacı ve turşucu gediği ta‘bîr olunur âlât-ı lâzıme-i ma‘lûmelerin nısfı mukaddemâ benim ve nısf-ı âharı merkūm es-Seyyid Ali Usta’nın mâlımız olmağla âlât-ı mezkûreleri ber-vech-i âtî her birimiz zamanen mühâye’e tarîkiyle zabt etmek üzere karar verdiğimizde merkūm es-Seyyid Ali Usta âlât-ı lâzıme-i ma‘lûmeyi işbu târih-i vesîkadan bir sene-i kâmile mühâye’e tarîkiyle müstakıllen evvel zabt ve tasarruf ve senesi tamamında bana teslîme ta‘ahhüd edip ben dahi ba‘dehû bir sene-i kâmile müstakıllen zabt ve tasarruf etmek üzere mühâye’e etmemizle fîmâ-ba‘d her birimiz âharın zaman-ı zabtına kat‘a ta‘arruz etmemek üzere ta‘ahhüd eyledik dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Şevvâl sene 1238. Şühûdü’l-hâl: Kethudâ İsmail Ağa, Küçükkaramanlı es-Seyyid Ali Ağa, Yiğitbaşı Mehmed Usta, Üsküdarlı İsmail Ağa.