İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 347 Hüküm no: 336 Orijinal metin no: [77b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sarı Ömer oğlu Süleyman Usta b. Ömer’in, Osman Usta b. Ömer’in yerine kafesçi esnafı kethudalığına tayini Kafesçi esnâfına kethudâ nasbı Mahmiye-i İstanbul’da vâki‘ kafesçi esnâfının bir müddetden beri kethudâları olan Osman Usta b. Ömer nâm kimesne meclis-i şer‘-i münîrde umûr-ı esnâfı rü’yetden ızhâr-ı acz ve rızâsıyla kethudâlıktan keff-i yed edip azlolunmağla yerine esnâf-ı mezkûre üzerlerine bir kethudâ nasbı lâzım ve mühim olunmağın emânet ile ma‘rûf ve istikāmet ile mevsûf ve örf ve âdetlerine vâkıf ve nizâmlarını arîf ve her vechile kethudâlık umûrunu rü’yete kādir ve cümlesinin mu‘temed ve muhtârları idüğü esnâf-ı mezkûreden Mütevellî es-Seyyid Ahmed Usta b. es-Seyyid Ahmed Usta b. es-Seyyid Mehmed b. es-Seyyid Ahmed ve Ali Usta b. Mehmed ve es-Seyyid İbrahim Usta b. es-Seyyid Ali ve Abdullah Usta b. Kasım nâm Müslimîn ve sâirleri haberleriyle zâhir olan yine esnâf-ı merkūmeden işbu bâ‘isü’l-kitâb Sarı Ömer oğlu Süleyman Usta b. Ömer’i hâkim-i muvakkı‘-ı sadr-ı kitâb bi-tevkī‘ihi’r-refî‘i’l-müstetâb -tûbâ-lehû ve hüsnü-meâb- efendi hazretleri esnâf-ı mezkûre üzerlerine iltimâslarıyla kethudâ nasb ve ta‘yîn ve esnâfından kimesneye hilâf-ı şer‘-i şerîf ve mugāyir-i rızâ te‘addî ve rencîde etmemek üzere emir ve tenbîh buyurduklarında ol dahi kethudâlık-ı merkūmu kabûl ve ber-mûceb-i emir ve tenbîh amel ve harekete ta‘ahhüd etmeğin mâ-vaka‘a [bi’t-taleb ketb olundu.] Fî 14 Şevvâl sene 1238. Şühûdü’l-hâl: Muhzırlar Kethudâsı İsmail Ağa, Muhzır Molla Halil.