İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 348 Hüküm no: 337 Orijinal metin no: [77b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail Ağa b. Mustafa’nın helvacı ve attar dükkânlarını Seyyid Ali Usta b. Ali’ye sattığı Mübâya‘a-i helvacı Mahmiye-i İstanbul’da kâin helvacı esnâfından İsmail Ağa b. Mustafa nâm kimesne meclis-i şer‘-i şerîf-i enverde yine esnâf-ı merkūmeden işbu hâmilü’l-kitâb es-Seyyid Ali Usta b. Ali nâm kimesne mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Samatya kapısı dâhilinde Hacı Hüseyin Ağa mahallesinde vâki‘ etrâf-ı erba‘ası cidâr-ı hısn ve kefere odaları ve Kahveci Hüseyin Ağa ve Yemenici dükkânları ve tarîk-i âm ile mahdûd birbirine muttasıl biri helvacı ve biri attâr dükkânlarının yirmi birer sehm i‘tibâriyle on iki sehmi âharın yedinde mâlı olmağla mâ‘adâsı olup akd-i âti’z-zikrin sudûruna değin benim yedimde mâlım ve mülküm olan dokuz sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîkim izniyle merkūm es-Seyyid Ali Usta’ya yedi yüz elli guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm yedi yüz elli guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle zikr olunan dokuz sehm hissede benim kat‘a alâka ve medhalim kalmayup merkūm [78a] es-Seyyid Ali Usta’nın mâl-ı müşterâsı ve hakk-ı sırfı olmuşdur dedikde gıbbe’t-tasdîki [‘ş-şer‘î] mâ-vaka‘a bi’t-taleb ketb olundu fi’l-yevmi’l-âşir min-Şevvâli’l-mükerrem li-sene semâne ve selâsîn ve mi’eteyn ve elf. Şühûdü’l-hâl: Kethudâ İsmail Ağa, Yiğitbaşı Mehmed Ağa, Kumkapılı Hüseyin Ağa, Galatalı Mehmed Usta, Küçükkaramanlı es-Seyyid Ali Ağa.