İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 348 Hüküm no: 338 Orijinal metin no: [78a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tayyibe bt. Salih’in ipçi dükkânını Debbağ Hacı Ahmed Ağa b. Hasan’a sattığı Mübâya‘a-i ipçi Mahmiye-i İstanbul’da Zeyrek kurbünde ve Voynuk Şücâeddin mahallesinde sâkine Tayyibe bt. Salih’in zevci ve tarafından husûs-ı âti’l-beyânı ikrâra vekîl olduğu zât-ı mezbûreyi bi’l-ma‘rifeti’ş-şer‘iye ârifân Debbâğ el-Hâc Mustafa Ağa b. Ali ve Eyüb Ağa b. Abdullah şehâdetleriyle sâbit olan Mehmed Efendi b. Osman ve yine mahalle-i mezbûrede sâkine Halime Hatun bt. Abdullah’ın zevci ve tarafından kezâlik husûs-ı âti’l-beyânı ikrâra vekîl olduğu yine zâtını ârifân şâhidân-ı mezbûrân şehâdetleriyle ber-nehc-i şer‘î sâbit olan Soğancı Molla Mehmed b. Veliyüddin’den her biri meclis-i şer‘-i şerîf-i enverde işbu bâ‘isü’l-kitâb Debbâğ el-Hâc Ahmed Ağa b. Hasan nâm kimesne mahzarında bi’l-vekâle ikrâr-ı tam ve takrîr-i kelâm edip müvekkilelerimiz mezbûretân Tayyibe ve Halime hatunlar mahmiye-i mezbûrede Zindân kapısı dâhilinde vâki‘ kokucu ve ipçi dükkânları beynlerinde kâin ma‘lûmü’l-hudûd bir bâb ipçi dükkânı derûnunda mevcûde yedlerimizde olan birer kıt‘a hüccet-i şer‘iye mûceblerince akd-i âti’z-zikrin sudûruna değin nısfıyet üzere yedlerimizde müşterek mâlımız olan beyne’l-esnâf gedik ta‘bîr olunur bir akçe tahtası ve bir peştahta ve bir kantar ve sâir âlât-ı lâzıme-i ma‘lûmemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile bin altı yüz elli guruşa mezbûr el-Hâc Ahmed Ağa’ya bey‘ ve temlik ve teslîm eylediğimizde ol dahi yedimizden iştirâ ve temellük ve tesellüm ve kabz ü kabûl ve semeni olan meblağ-ı merkūm bin altı yüz elli guruşu bize def‘ ü teslîm biz dahi yedinden ahz ü kabz ve nısfiyet üzere beynimizde iktisâm edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetlerini ibrâ-i âm ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i muharrere-i mezkûrede bizim kat‘a alâkamız kalmayup mezbûr el-Hâc Ahmed Ağa’nın mâl-ı müşterâsı ve hakk-ı sırfı olmuşdur dediklerinde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 14 Şevvâl sene 1238. Şühûdü’l-hâl: Muhzır Mahmud, Muhzır Molla Halil, el-Hâc Mustafa Ağa, Eyüb Ağa.