İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 349 Hüküm no: 339 Orijinal metin no: [78a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sandalcı esnafından Nikonimus v. Arab Artin’in mâlik olduğu sandalcı destgâhını İmâmzade çırağı Ali Usta b. Hüseyin’e sattığı Mübâya‘a-i sandalcı Hudâvendigâr-ı esbak cennet-mekân firdevs-âşiyân merhûm-ı mağfiret-nişân Sultan Selim Han -tâbe serâhû- hazretlerinin medîne-i Üsküdar’da vâki‘ Selîmiye ismiyle müsemmâ câmi‘-i şerîfleri evkāfına merbût sandalcı destgâhlarından mâ‘adâ Âsitâne-i aliyye civârında vâki‘ bilâd-ı selâsede ve tevâbi‘lerinde kâin bi’l-cümle sandalcı destgâhlarının bey‘ ü şirâ ve mu‘âmelât-ı sâiresi hüccetleri İstanbul mahkemesinden gayri mehâkimde takrîr ü tahrîr ve bir aded destgâh iki yüz guruşdan ziyâde semen [ile] bey‘ ü şirâ olunmak memnû‘ idüğü bâ-emr-i âlî şurût-ı müstahsene-i mer‘iyesinden olduğuna binâen esnâf-ı merkūmeden olup zikr olunan destgâhlardan bir aded destgâha mâlik olan Nikonimus v. Arab Artin nâm zimmî meclis-i şer‘-i hatîr-i lâzımü’t-tevkīrde esnâf-ı mezbûreden olup üç aded destgâha mâlik olan işbu bâ‘isü’l-kitâb İmâmzâde çırağı Ali Usta b. Hüseyin nâm kimesne mahzarında ikrâr-ı tam ve takrîr-i kelâm edip esnâfımızın mâlik oldukları destgâhlardan akd-i âti’z-zikrin sudûruna değin bâ-hüccet-i şer‘iye yedimde mâlım olan bir aded destgâhımı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile iki yüz guruşa mezbûr Ali Usta’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semen-i mezkûr iki yüz guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle [78b] fîmâ-ba‘d zikr olunan bir aded destgâhda benim kat‘a alâka ve medhalim kalmayup mukaddemâ mezbûr Ali Usta’nın mâlik olduğu üç aded destgâh ile ma‘an cem‘an dört aded destgâh mâl-ı müşterâsı ve hakk-ı sırfıdır dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 10 Şevvâl sene 1238. Şühûdü’l-hâl: Kethudâ es-Seyyid el-Hâc Hafız Mehmed Emin Ağa, Yiğitbaşı Ebûbekir Ağa.