İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 350 Hüküm no: 340 Orijinal metin no: [78b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Ebubekir Alemdar b. Seyyid Mehmed’in yumurtacı dükkânını Mustafa Yazıcı b. Hüseyin’e sattığı Mübâya‘a-i yumurtacı Mahmiye-i İstanbul’da kâin yumurtacı esnâfından es-Seyyid Ebûbekir Alemdar b. es-Seyyid Mehmed nâm kimesne meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb Mustafa Yazıcı b. Hüseyin nâm kimesne mahzarında ikrâr-ı tam ve takrîr-i kelâm edip mahmiye-i İstanbul hısnı ebvâbından Odunkapısı hâricinde yumurtacılar içinde Hüseyin Yazıcı ve es-Seyyid Mehmed Alemdar dükkânları beynlerinde kâin bir bâb yumurtacı dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharların yedlerinde mâlları olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım ve mülküm olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve âhar şerîklerim izniyle merkūm Mustafa Yazıcı’ya beş bin guruşa bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm beş bin guruşu bana def‘ ü teslîm ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan nısf hisse-i şâyi‘ada benim kat‘a alâka ve medhalim kalmayup merkūm Mustafa Yazıcı’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 17 Şevvâl sene 1238. Şühûdü’l-hâl: Kethudâ Ömer Ağa, Mütevellî Halil Ağa, es-Seyyid Mehmed Ağa, el-Hâc Ömer Ağa.