İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 351 Hüküm no: 341 Orijinal metin no: [78b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Usta b. Seyyid Mustafa’nın çörekçi ve simitçi fırını gediğini Ali Usta b. İbrahim’e sattığı Mübâya‘a-i çörekçi Mahmiye-i İstanbul’da kâin çörekçi esnâfından es-Seyyid Mustafa Usta b. es-Seyyid Mustafa nâm kimesne meclis-i şer‘-i şerîf-i enverde yine esnâf-ı merkūmeden işbu bâ‘isü’l-kitâb Ali Usta b. İbrahim mahzarında ikrâr-ı tam ve takrîr-i kelâm edip mahmiye-i mezbûrede Şehremîni kurbünde İnadiye nâm mahâlde vâki‘ lede’l-ahâli ve’l-cîrân ma‘lûmü’l-hudûd bir bâb çörekçi ve simidci fırını derûnunda mevcûde beyne’l-hıref gedik ta‘bîr olunur âlât-ı ma‘lûmenin yüz yirmi sehm i‘tibâriyle altmış sehmi mezbûr Ali Beşe’nin mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye yedimde mâlım olan altmış sehm hissemi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile merkūm Ali Beşe’ye bin beş yüz guruşa bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semen-i merkūm bin beş yüz elli guruşu bana def‘ ü teslîm eylediğinde ben dahi yedinden tamamen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ dahi etmemizle fîmâ-ba‘d âlât-ı gedik-i merkūmda benim kat‘a alâkam kalmayup mecmû‘u mezbûr Ali Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 17 Şevvâl sene 1238. Şühûdü’l-hâl: Kethudâ İbrahim Ağa, Yiğitbaşı Mehmed Usta, Yazıcı Ali Efendi, Muhzır Molla Halil, Muhzır Mahmud ve gayruhum.