İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 351 Hüküm no: 342 Orijinal metin no: [79a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. İbrahim’ın borcuna karşılık çörekçi ve simitçi fırınını Nefise Hatun bt. Ali’ye rehin bıraktığı İnadiye fırını rehin Mahmiye-i İstanbul’da kâin çörekçi esnâfından Ali Beşe b. İbrahim meclis-i şer‘-i şerîf-i enverde bâ‘isetü’l-vesîka Nefise Hatun bt. Ali’nin zevci ve tarafından husûs-ı âti’l-beyânı vekîl-i müseccel-i şer‘îsi es-Seyyid Mehmed Ağa b. es-Seyyid Mehmed Sadık mahzarında ikrâr-ı tam ve takrîr-i kelâm edip mezbûr es-Seyyid Mehmed Ağa zevcesi müvekkile-i mezbûre Nefise Hatun’un mâlından bi’l-vekâle bana iki bin guruş ikrâz ve teslîm ben dahi yedinden iktirâz ve kabz ve umûruma sarfla istihlâk edip meblağ-ı mezbûr ile semeni işbu târih-i vesîkadan bir sene tamamına değin müeccel ve mev‘ûd yine müvekkile-i mezbûrenin mâlından vekîl-i merkūm yedinden iştirâ ve kabz eylediğim bir cild Behcetü’l-Fetâvâ semeninden üç yüz guruş ki cem‘an iki bin üç yüz guruş zimmetimde müvekkile-i mezbûre Nefise Hatun’a vâcibü’l-edâ deynim olup mukābelesinde mahmiye-i mezbûrede Şehremîni kurbünde İnadiye nâm mahâlde kâin ma‘lûmü’l-hudûd bir bâb çörekçi ve simidci fırını derûnunda mevcûde beyne’l-esnâf gedik ta‘bîr olunur bâ-hüccet-i şer‘iye yedimde mâlım olan âlât-ı lâzıme-i ma‘lûmemi rehin vaz‘ ve vekîl-i mezbûra teslîm eylediğimde ol dahi irtihân ve kabz ve kabûl ve yine müvekkile-i mezbûrenin izniyle bi’l-vekâle i‘âre ve teslîm ben dahi isti‘âre ve kabz etmemle yedimde âriyetdir dedikde gıbbe’t-tasdîk çörekçiler Kethudâsı İbrahim Ağa b. Mustafa meclis-i şer‘-i münirde vekîl-i mezbûr es-Seyyid Mehmed Ağa mahzarında ikrâr-ı tam ve takrîr-i kelâm edip mukırr-ı mezbûr Çörekçi Ali Beşe’nin zimmetinde müvekkile-i mezbûre Nefise Hatun’a edâsı vâcib deyni olan meblağ-ı mecmû‘-ı mezkûr iki bin üç yüz guruşa tarafeynden bi’l-emr ve’l-kabûl kefâlet-i mutlaka-i sahîha-i şer‘iye ile ben dahi kefîl bi’l-mâl ve dâminin dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 17 Şevvâl sene 1238. Şühûdü’l-hâl: Eş-şâhidûne’s-sâbıkūn.