Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 345 Hüküm no: 381 Orijinal metin no: [60b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saime bt. Mehmed’in Mehmed b. Mustafa’dan muhâlaa yoluyla boşandığı Mahmiye-i İstanbul’da Ali Paşa-yı Atîk mahallesinde sâkine olup zâtını ma‘rifet-i şer‘iyye ile ârifân olan Mehmed b. Dilaver ve Ahmed b. Abdullah nâm kimesneler ta‘rîfleriyle mu‘arrefe Sâime bt. Mehmed nâm hâtun meclis-i şer‘-i şerîf-i enverde zevc-i dâhili bâ‘isü hâze’l-kitâb Mehmed b. Mustafa mahzarında bi tav‘ihâ ikrâr ve takrîr-i kelâm edip mezbûr Mehmed ile beynimizde hüsn-i zindegânîmiz ol[ma]mağla zimmetinde mütekarrir ve ma‘kūdun-aleyh olan bin sekiz yüz akçe mehr-i müeccelim ve nafaka-i iddet-i mu‘ayyenem üzerlerine ve me’ûnet-i süknâm dahi kendi üzerime olmak üzre mezbûr Mehmed ile muhâla‘a olup ol dahi ber vech-i muharrer hul‘u kabûl eylediğinden sonra hukūk-ı zevciyyete ve gayra müte‘allika âmme-i da‘vâdan her birimiz [âharın] zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sânî min Şa‘bâni’l-mu‘azzam li sene seb‘a ve tis‘în ve elf. Şuhûdü’l-hâl: Mustafa Efendi b. Durak el-İmâm, Mustafa Çelebi b. Mahmud, Mehmed Çelebi b. el-Hâc Yusuf, Sefer b. İslâm, Mehmed b. Abdullah, İbrahim Çelebi b. Ahmed, Hasan b. Mustafa, Mehmed b. Ahmed.