İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 352 Hüküm no: 343 Orijinal metin no: [79a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Moğsis v. Tavit’in kavukçu ustası olduğu ve dükkân açmasına izin verildiği Kavukçu esnâfına dâirdir Mahmiye-i İstanbul’da Çarşı-yı Kebîr’de vâki‘ kavukçu esnâfından mâ‘adâ Çarşı-yı Kebîr hâricinde Dîvânyolunda ve Ayasofya-i Kebîr Câmi‘-i şerîfi kurbünde ve Cağalzâde Sarayı kurbünde vâki‘ terlikçiler sûkunda ve mahâll-i sâirede kâin kavukçu esnâfı zimmî tâifesinin ustabaşıları Karabet v. Asvador ve Kerope v. Manuk ve Kirkor v. Karabet ve Anderyas v. Atam ve Ohannes v. Bedros nâm zimmîler ve sâirleri meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’s-sifr Moğsis v. Tavit nâm zimmî hâzır olduğu hâlde her biri takrîr-i kelâm edip mesfûr Moğsis zimmî bundan akdem hâlik olan ustalarımızdan Şirin nâm zimmîden san‘at-ı mezkûremizi tamamen görüp ahz birle mahâret kesbettikde kāide-i mer‘iyemiz üzere düstûr verülüp kalfa ve ba‘dehû usta olup hâlik-i mesfûr Şirin zimmî ile sağlığında bi’l-ma‘iye san‘at-ı mezkûreyi i‘mâl eder iken mesfûr Şirin zimmî hâlik oldukda mesfûr Moğsis zimmî müstakıllen dükkân küşâd edip san‘atı i‘mâl murâd eylediğinde yedlerimizde olan fermân-ı âlî-şân mazmûn-ı münîfine mugāyir ba‘zı kimesneler mümâna‘at etmekle emr-i âlî-i müşârün-ileyh üzere kıbel-i şer‘den mesfûr Moğsis zimmî[ye] izin verilmek bizim [ve] mesfûrun matlûbumuzdur dediklerinde hâzır-ı mesfûr dahi ba‘de’t-tasdîk bu makūle sanâyi‘de inhisâr şer‘an ve kānûnen memnû‘[d]an olmağla hâkim-i hâsım ve’l-ecnâb-veffakallâhu te‘âlâ ilâ-sebîli’s-savâb- efendi hazretleri dahi tâife-i merkūmenin yedlerinde olan fermân-ı âlî-şân mazmûn-ı münîfi üzere mesfûr Moğsis zimmîye kavukçu ustası olup murâd eylediği mahâlde dükkân küşâd kavukçuluk san‘atını i‘mâl etmek üzere izin verilmeğin mâ-vaka‘a [bi’t-taleb ketb olundu.] Fî 17 Şevvâl sene 1238. Şühûdü’l-hâl: Muhzır Molla Hüseyin, Muhzır Molla Halil, Muhzır Mehmed Emin.