İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 353 Hüküm no: 344 Orijinal metin no: [79b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. yumurtacılar kethudası Hacı Mehmed Ağa’nın borcuna karışılık yumurtacı dükkânını Kösec Mehmed Ağa b. Hasan’a rehin bıraktığı İdâne-i rehn-i yumurtacı Mahmiye-i İstanbul’da kâin yumurtacı esnâfından Mustafa b. yumurtacılar kethudâsı esbak merhûm el-Hâc Mehmed Ağa nâm kimesne meclis-i şer‘-i şerîf-i enverde yine esnâf-ı merkūmeden işbu bâ‘isü’l-kitâb Kösec Mehmed Ağa b. Hasan mahzarında ikrâr-ı tam ve takrîr-i kelâm edip mezbûr Kösec Mehmed Ağa mâlından nakden bana iki bin beş yüz guruş ikrâz ve teslîm ben dahi yedinden iktirâz ve kabz ve kendi umûruma sarfla istihlâk etmemle meblağ-ı mezkûr iki bin beş yüz guruşu zimmetimde mezbûr Kösec Mehmed Ağa’ya edâsı vâcib sahîhan deynim olup mukābelesinde mahmiye-i mezbûrede Odunkapısı hâricinde yumurtacılar sûkunda vâki‘ ma‘lûmü’l-hudûd bir bâb yumurtacı dükkânı derûnunda mevcûde beyne’l-esnâf gedik ta‘bîr olunur bâ-i‘lâm-ı şer‘î şirâen mâlik olduğum bir kantar ve bir terâzî ma‘a derâhim ve bir peştahta ve bir akçe tahtası ve sâir âlât-ı lâzıme-i ma‘lûmemi rehin vaz‘ ve mezbûr Kösec Mehmed Ağa’ya teslîm eylediğimde ol dahi irtihân ve kabz ve kabûl ve yine bana i‘âre ve teslîm eylediğinde ben dahi isti‘âre ve kabz etmemle yedimde âriyetdir dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 11 Şa‘bân sene 1238. Şühûdü’l-hâl: Mütevellî Halil Ağa, el-Hâc Ahmed, Bölükbaşı Mehmed Said, Mustafa Yazıcı.