İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 354 Hüküm no: 345 Orijinal metin no: [79b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlyas Beşe b. Hasan’ın habbaz değirmeni ve fırınını Hendekli Süleyman Beşe b. İbrahim’e sattığı Çardaklı fırını mübâya‘ası Mahmiye-i İstanbul’da kâin ekmekçi esnâfından İlyas Beşe b. Hasan nâm kimesne meclis-i şer‘-i hatîr-i lâzımü’t-tevkīrde yine esnâf-ı merkūmeden işbu bâ‘isü’l-kitâb Hendekli Süleyman Beşe b. İbrahim mahzarında ikrâr-ı tam ve takrîr-i kelâm edip mahmiye-i mezbûrede Kādırga limanı kurbünde vâki‘ Çardaklı değirmeni demekle meşhûr ma‘lûmü’l-hudûd beş horoslu bir bâb habbâz değirmeni ve ona merbût Çardaklı fırını demekle şehîr bir bâb habbâz fırını derûnunda mevcûde beyne’l-hıref gedik ta‘bîr olunur yirmi re’s bârgir ve sâir âlât-ı lâzımeden on altı re’s bârgir ve onlara isâbet eden sâir âlât-ı lâzıme âharların olmağla mâ‘adâsı olup akd-i âti’z-zikrin sudûruna değin benim yedimde mâlım olan dört re’s bârgir ve onlara isâbet eden sâir âlât-ı lâzıme-i ma‘lûmeyi tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile üç bin iki yüz yirmi sekiz guruşa mezbûr Süleyman Beşe’ye bey‘ ve temlik ve vech-i lâyıkıyla teslîm eylediğimde ol dahi yedimden iştirâ ve temellük ve tesellüm ve kabz ve kabûl ve semen-i mezkûr üç bin beş yüz yirmi sekiz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i de‘âvîden tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d âlât-ı lâzıme-i mezkûreden dört re’s bârgirde ve onlara isâbet eden sâir âlât-ı lâzımede benim kat‘a alâka ve medhalim kalmayup mezbûr Süleyman Beşe’nin emvâl-i müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 22 Şaban sene 1238. Şühûdü’l-hâl: Kethudâ Mehmed Efendi, Muhzır Emin, Muhzır Mahmud, Muhzır Hüseyin, Muhzır Molla Halil, Muhzır İbrahim Odabaşı. Beyaz