İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 354 Hüküm no: 346 Orijinal metin no: [80a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Beşe b. Mehmed’in bakkal dükkânı gediğini Seyyid İbrahim Edhem Ağa b. Mustafa’ya sattığı Bakkāl Çarşamba’da İstanbulağası Mahmiye-i İstanbul’da kâin bakkāl esnâfından Ali Beşe b. Mehmed nâm kimesne meclis-i şer‘-i şerîf-i enverde esnâf-ı merkūmeden işbu bâ‘isü’l-kitâb es-Seyyid İbrahim Edhem Ağa b. Mustafa nâm kimesne mahzarında ikrâr-ı tam ve takrîr-i kelâm edip mahmiye-i merkūmede Çarşambapazarı kurbünde Mehmed Ağa Câmi‘i civârında vâki‘ İstanbulağası dükkânı demekle ma‘rûf ma‘lûmü’l-hudûd bir bâb bakkāl dükkânı derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle altmış sehmi âharın yedinde mâlı olmağla mâ‘adâsı olup akd-i âti’z-zikrin sudûruna değin bâ-hüccet-i şer‘iye benim yedimde mâlım ve mülküm olan altmış sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile âhar şerîkim izin ve icâzeti ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle merkūm es-Seyyid İbrahim Edhem Ağa’ya altı yüz guruşa bey‘ ü temlik ve vech-i lâyıkı üzere teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semen-i merkūm altı yüz guruşu bana def‘ ve teslîm eylediğinde ol dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan altmış sehm hisse-i şâyi‘ada benim kat‘a alâkam kalmayup merkūm es-Seyyid İbrahim Edhem Ağa’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 29 Şevvâl sene 1238. Şühûdü’l-hâl: Pazarbaşı Süleyman Ağa, Bölükbaşı Abdi.