İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 355 Hüküm no: 347 Orijinal metin no: [80a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yuvan v. Misayel’in bakkal dükkânı gediğini Yusuf Beşe b. İsmail’e sattığı Bakkāl Mahmiye-i İstanbul’da kâin bakkāl esnâfından Yuvan v. Misayel nâm zimmî meclis-i şer‘-i şerîf-i enverde esnâf-ı merkūmeden işbu bâ‘isü’l-kitâb Yusuf Beşe b. İsmail nâm kimesne mahzarında ikrâr-ı tam ve takrîr-i kelâm edip mahmiye-i mezbûrede Bâb-ı Âsafi kurbünde kâin derzibaşı dükkânı demekle meşhûr bir bâb ve yine mahâll-i merkūmede vâki‘ Hüseyin Molla dükkânı demekle arîf bir bâb ki cem‘an ma‘lûmü’l-hudûd iki bâb bakkāl dükkânları derûnunda mevcûde beyne’l-hıref gedik ta‘bîr olunur âlât-ı lâzıme-i ma‘lûmemi her biri yüz yirmişer sehm i‘tibâriyle kırkar sehmden seksen sehmi el-Hâc Mehmed b. Mustafa’nın ve kezâlik seksen sehmi Harbeci Topuz Osman’ın mâlları olmağla mâ‘adâları olup akd-i âti’z-zikrin sudûruna değin bâ-hüccet-i şer‘iye yedimde mâlım olan her birinden kırkar sehmden cem‘an seksen sehm hisse-i şâyi‘amı tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ve mezbûrân el-Hâc Mehmed ve Osman’ın izin ve icâzetleri ve bakkālân pazarbaşısı ve bölükbaşı ve bi’l-cümle nizâm ustaları ma‘rifetleriyle mezbûr Yusuf Beşe’ye iki bin iki yüz elli guruşa bey‘ ve temlik ve vech-i lâyıkı üzere teslîm eylediğimde ol dahi yedimden iştirâ ve temellük ve kabz ü kabûl ve semeni olan meblağ-ı mezkûr iki bin iki yüz elli guruşu bana def‘ ü teslîm ben dahi yedinden ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt etmemizle fîmâ-ba‘d iki bâb bakkāl dükkânları derûnlarında mevcûde gedik âlâtına ber-i‘tibâr-ı merkūm üzere kırkar sehmden cem‘an seksen sehm hisse-i şâyi‘ada benim kat‘a alâkam kalmayup mezbûr Yusuf Beşe’nin mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 28 Şevvâl sene 1238. Şühûdü’l-hâl: Eş-şâhidûne’s-sâbıkūn.