İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 356 Hüküm no: 348 Orijinal metin no: [80b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Süleyman Usta’nın iki adet çulha destgâhını Seyyid Mehmed Usta b. Musa’ya sattığı Çulha mübâya‘asıdır Mahmiye-i İstanbul’da bürüncük ve bez nesc ve i‘mâl eden çulha esnâfından es-Seyyid Süleyman Usta nâm kimesne meclis-i şer‘-i şerîf-i enverde yine esnâf-ı mezkûreden işbu bâ‘isü’l-kitâb es-Seyyid Mehmed Usta b. Musa nâm kimesne mahzarında ikrâr-ı tam ve takrîr-i kelâm edip esnâfımızın yedlerinde olan bir kıt‘a fermân-ı âlî-şânda mezkûr olduğu üzere şurût-ı nizâmımızda dâhil her iki destgâh bir gedik i‘tibâriyle Âsitâne-i aliyyede esnâfımızın mâlik oldukları yüz seksen iki aded destgâhlardan mahmiye-i mezbûrede Draman kurbünde şeyhülislâm-ı esbak merhûm Ömer Hulusi Efendi’nin binâ eylediği han derûnunda kâin ma‘lûmü’l-hudûd bir bâb oda derûnunda mevcûde akd-i âti’z-zikrin sudûruna değin bâ-hüccet-i şer‘iye bir gedik i‘tibâriyle yedimde mâlım olan iki aded çulha destgâhımı cemî‘ âlât-ı lâzımeleriyle tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ve safka-i vâhide ile altı yüz guruşa mezbûr es-Seyyid Mehmed Usta’ya bey‘ ve temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı mezkûr altı yüz guruşu bana def‘ ü teslîm ben dahi yedinden tamamen ve kâmilen ahz ü kabz edip mebî‘-i mezkûrun tağrîr ve gabnine müte‘allika âmme-i da‘vâdan tarafeynden her birimiz âharın zimmetini ibrâ-i âmm-ı sahîh-i şer‘î ile kabûlü hâvî ibrâ ve iskāt dahi etmemizle fîmâ-ba‘d zikr olunan iki aded destgâhda benim kat‘a alâka ve medhalim kalmayup cemî‘ âlât-ı lâzımeleriyle mezbûr es-Seyyid Mehmed Usta’nın mâl-ı müşterâsı ve hakk-ı sırfı olmuşdur dedikde gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 28 Şevvâl sene 1238. Şühûdü’l-hâl: Kethudâ es-Seyyid Ahmed Ağa b. Mustafa, Yiğitbaşı Hüseyin b. Mehmed, Halil Usta b. Mehmed.