İstanbul Mahkemesi 138 Numaralı Sicil (H.1237-1238 / M. 1821-1822) cilt: 87, sayfa: 359 Hüküm no: 350 Orijinal metin no: [81a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum isyanına karışan Ananosti v. Anderya’nın bakkal dükkânının Nedniko bt. Panayot’a satıldığı Kasımpaşa’da Seyl kapısı nâm mahâlde İbrahim Ağa dükkânı Kezâlik hâzır oldukları hâlde meclis-i şer‘-i hatîr-i lâzımü’t-tevkīrde şahsı ta‘rîf-i şer‘î ile mu‘arrefe olan işbu bâ‘isetü’s-sifr Nedniko bt. Panayot nâm Nasrâniye muvâcehesinde bi’l-memûriye ikrâr-ı tam ve takrîr-i kelâm edip mahrûse-i Galata’ya muzâfe kasaba-i Kasımpaşa’da Seylkapısı nâm mahâlde vâki‘ zikr olunan kırk yedi bâb dekâkin ve mağazalardan İbrahim Ağa dükkânı demekle şehîr ma‘lûmü’l-hudûd bir bâb bakkāl dükkânı derûnunda mevcûde beyne’l-esnâf gedik ta‘bîr olunur âlât-ı lâzıme-i ma‘lûmenin yüz yirmi sehm i‘tibâriyle elli sehmine mâlik olan bakkāl Ananosti v. Anderya nâm zimmî bundan akdem vukū‘ bulan Rum tâifesi fesâdında medhali olduğuna binâen firâr etmekle âlât-ı lâzıme-i merkūmeden elli sehm hisse-i mezbûresi cânib-i mîrîden zabt ve tüccâra nizâmları üzere alacakları << olan >> içün terk olundukda bâ-fermân-ı âlî âhara bey‘a memûr olmamla esnâfımızın şurût-ı nizâmları üzere zikr olunan elli sehm hisseyi tarafeynden îcâb ve kabûlü hâvî şurût-ı müfsideden ârî bey‘-i kat‘î-i mu‘teber ile ba‘de’l-müzâyede ve inkıtâ‘ü’r-rağbe semen-i misli idüğü bi’l-ihbâr zâhir olan bin yüz guruşa mesfûre Nedniko Nasrâniyeye bi’l-memûriye bey‘ ü temlik ve teslîm eylediğimde ol dahi yedimden iştirâ ve temellük ve tesellüm ve kabz ü kabûl ve semeni olan meblağ-ı merkūm bin yüz guruşa bana def‘ ü teslîm ben dahi yedinden bi’l-memûriye ahz ü kabz ve tüccâr ve esnâf-ı merkūmuna teslîm eyledim fîmâ-ba‘d âlât-ı lâzıme-i mezkûrenin i‘tibâr-ı merkūm üzere elli sehmden firârî-i mesfûrun ve cânib-i mîrî tüccâr ve esnâfdan kimesnenin alâka ve medhali kalmayup mesfûr Nedniko Nasrâniye[nin] mâl-ı müşterâsı olmuşdur gıbbe [’t-tasdîki’ş-şer‘î mâ-vaka‘a bi’t-taleb ketb olundu.] Fî 21 Ca sene [1]238. Şühûdü’l-hâl: Eş-şâhidûne’s-sâbıkūn.